Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 143 Hüküm no: 114 Orijinal metin no: [15b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yapağı bakıcılığında ortak iken şirketlerini fesheden Agop v. Saroş ile Asvador v. Kirkor’un zimmetlerini ibra ettikleri Hammâl tâifesinden Agop v. Saroş nâm Ermeni meclis-i şer‘de yine tâife-i mezbûreden işbu hâmilü’r-rakīm Asvador v. Kirkor nâm Ermeni muvâcehesinde ikrâr ve takrîr-i kelâm edip merkūm Asvador ile târih-i kitâba gelince yapağı bakıcılığı san‘atından şerîkler olup hâlâ beynimizde cereyân eden cüz’î ve küllî hesâbımızı görüp fesh-i şirket eylediğimizden sonra şirket-i merkūmeye ve târih-i kitâba gelince beynimizde cereyân eden kalîl ü kesîr ve celîl ü hakīr ahz u i‘tâ ve mu‘âmelât-ı şettâdan hukūk-ı ma‘lûme ve mechûleye müte‘allika âmme-i de‘âvî ve mutâlebât ve eymân ve muhâsamâtdan her birimiz âharın zimmetini ibrâ ve ıskāt eyledik ba‘de’l-yevm bir birimiz ile vechen mine’l-vücûh ve sebeben mine’l-esbâb da‘vâ [ve] nizâ‘ımız yokdur dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâbi‘ aşer min-Şa‘bâni’l-mu‘azzam sene 1137. Şuhûdü’l-hâl: Hüseyin Kethüda b. Receb, Yahya b. Hüseyin, Ali b. Piri, İbrahim b. Muharrem, Bogos v. Racil, Markar v. Hani, Nikogos v. Semik, Haçik v. Mardiros.