Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 144 Hüküm no: 116 Orijinal metin no: [16a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha Hanım bt. Mehmed Bey’in vârislerinin vasisi Abdullah Bey’den hisselerini tahsil ettikleri Ahseret bimâ fîhi nemakahu’l-fakīr ileyhi azze şânuhû el-Hâc Mustafa el-Kādî bi-medîne-i Galata -gufira leh-. Husûs-ı âti’z-zikrin mahallinde ketb ü tahrîri iltimâs olunmağın savb-ı şer‘-i enverden irsâl olunan mevlânâ Ömer Efendizâde Ali Efendi mahrûse-i Galata tevâbi‘inden kasaba-i Beşiktaş ahâlîsinden umdetü’l-emâcid ve’l-ekârim câmi‘u’l-mehâmid ve’l-mekârim izzetlü Abdullah Bey b. Safiye Sultanzâde Mehmed Bey’in sa‘âdet-hânelerine varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf-i nebevî eyledikde bundan akdem üveyi babası Ali Çavuş nâm kimesnenin kasaba-i merkūme mahallâtından Sinan Paşa mahallesinde vâki‘ sâkin olduğu menzilde sâkine iken müteveffiye olan sagīre Saliha Hânım bt. el-mezbûr Mehmed Bey’in verâseti anası Şehnaz Hâtun bt. Abdullah ile li-ümmin kız karındaşı Âişe nâm sagīre ve li-ebeveyn kız karındaşı Ümmühâni Hânım’a ve li-ebin er karındaşları mûmâ-ileyh Abdullah Bey ve Ebûbekir Bey’e ve li-ebin kız karındaşları Fâtıma Hânım ve Rukiye Hânım’a münhasıra olup kable’l-kısme sagīre-i merkūme Âişe dahi vefât edip verâseti anası mezbûre Şehnaz ile mezbûr Ali Çavuş b. İsmail’e münhasıra ve tashîh-i meseleleri bi-hükmi’l-münâsahati’ş-şer‘iyye 36 sehimden i‘tibâr olunur sihâm-ı mezbûreden 8 sehmi mezbûre Şehnaz Hâtun’a ve 18 sehmi mezbûre Ümmühâni Hânım’a ve ikişer sehmi mezbûrân Abdullah Bey ve Ebûbekir Bey’den her birine ve birer sehmi mezbûretân Fâtıma Hânım ve Rukiye Hânım’dan her birine ve 4 sehmi mezbûr Ali Çavuş’a isâbet ve intikāl eylediği lede’ş-şer‘i’l-enver zâhir ve mukarrer oldukdan sonra mezbûre Şehnaz zâtı ba‘de’t-ta‘rîfi’ş-şer‘î meclis-i ma‘kūd-ı mezbûrda müteveffâ-yı mezbûre Saliha Hânım’ın li-ebin er karındaşı ve tesviye-i umûruna kıbel-i şer‘den mansûb vasîsi olmağla müteveffât-ı mezbûre Saliha Hânım’a babası Safiye Sultanzâde Mehmed Bey merhûmdan muntakıll hissesine vesâir terekesine bi’l-vesaye vâzı‘u’l-yed olan işbu sâhibü’l-kütüb mûmâ-ileyh Abdullah Bey mahzarında ikrâr ve takrîr-i kelâm edip kızım müteveffât-ı mezbûre Saliha Hânım’a ber mûceb-i defter-i kassâm-ı askerî babası merhûm-ı mûmâ-ileyhin terekesinden olan nükūd ve menzil ve mahzenler ve şükûfe ve çiftlik ve içinde mevcûd devâb ve mevâşî ve âlât-ı zirâ‘at ve eşyâ-yı hirâset ve eşyâ-i sâire semenlerinden isâbet ve intikāl eden hisse-i irsiyyesinden tashîh-i mezbûr üzere bana isâbet eden mikdâr-ı mezkûr hisse-i irsiyyemi mûmâ-ileyh Abdullah Bey’den taleb ve da‘vâ sadedinde iken beynimize muslihûn tavassut edip beni da‘vâ-yı mezkûremden mûmâ-ileyh Abdullah Bey ile iki yüz altmış yedi guruşa inşâ-i akd-i sulh eylediklerinde ben dahi ber-vech-i muharrer rızâmla sulh-i mezbûru kabûl ve bedel-i sulh olan meblağ-ı merkūm iki yüz altmış yedi guruşu mûmâ-ileyh yedinden tamâmen ahz u kabz eylediğimden sonra kızım müteveffât-ı mezbûre Saliha Hânım’a babası mûmâ-ileyh Mehmed Bey’den ve li-ebin kız karındaşı Zeyneb Hânım’dan muntakıl hisse-i irsiyyesine vesâir ma‘lûm ve mechûl bi’l-cümle terekesine müte‘allika âmme-i da‘vâ ve mutâlebât ve kâffe-i eymân ve muhâsamâtdan mûmâ-ileyh Abdullah Bey’in zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm müteveffât-ı mezbûrenin mecmû‘ terekesine müte‘allika mûmâ-ileyh Abdullah Bey ile vechen mine’l-vücûh da‘vâ ve nizâ‘ım kalmadı dedikde gıbbe’t-tasdîki’ş-şer‘î mezbûr Ali Çavuş dahi meclis-i mersûmda mûmâ-ileyh Abdullah Bey muvâcehesinde ikrâr ve takrîr-i kelâm edip müteveffât-ı mezbûre Saliha Hânım’ın ber mûceb-i defter-i kassâm-ı askerî hisse-i irsiyyesinden tashîh-i mezbûr üzere bana isâbet eden hisse-i irsiyyemi taleb ve da‘vâ sadedinde iken beynimize muslihûn tavassut edip beni mûmâ-ileyh Abdullah Bey ile da‘vâ-yı mezkûremden yüz otuz dört guruş üzerine sulh eylediklerinde ben dahi ber-vech-i muharrer sulh-i merkūmu kabûl ve bedel-i sulh olan mablağ-ı merkūm yüz otuz dört guruşu mûmâ-ileyh yedinden tamâmen ahz u kabz eylediğimden sonra müteveffât-ı mezbûre Saliha Hânım’a babası merhûm Safiye Sultanzâde Mehmed Bey’den muntakıl eşyâ-i mebî‘a semenine ve nükūda ve menzil ve mahzenle ve şükûfe ve çiftlik ve içinde mevcûd devâb ve mevâşî ve âlât-ı zirâ‘at ve eşyâ-yı hirâset vesâir ma‘lûm ve mechûl ism-i mâl ıtlâk olunur mecmû‘ terekesine müte‘allika âmme-i da‘vâdan mûmâ-ileyh Abdullah Bey’in zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm mûmâ-ileyh Abdullah Bey ile tereke-i müteveffât-ı mezbûreye müte‘allika da‘vâ ve nizâ‘ım kalmadı dedikde gıbbe’t-tasdîki’l-mu‘teber vâki‘ hâli mevlânâ-yı mezbûr mahallinde ketb u tahrîr ba‘dehû meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ aşer min-Şa‘bâni’l-mu‘azzam sene 1137. Şuhûdü’l-hâl: Fahrü’l-kuzât Mahmud Efendi b. Musa, Fahrü’l-akrân Mustafa Ağa b. Mehmed Ağa, İbrahim Efendi b. Mehmed tâbi‘-i ...? İmâm efendi hazretleri, Dellâl Ahmed Çelebi b. Ali, Berber Ali Çelebi b. Abdullah.