Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 145 Hüküm no: 117 Orijinal metin no: [16b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Durmuş b. Abdullah’ın vârislerinden Ali hissesini Mustafa b. Abdullah’a sattığı Vilâyet-i Anadolu’da Rize kazâsına tâbi‘ Hansa nâm karye sâkinlerinden iken bundan akdem vefât eden Hüseyin b. Durmuş b. Abdullah’ın verâseti zevc-i metrûkesi Âişe bt. Ali nâm hâtun ile sulbî sagīr oğulları Ahmed ve Mustafa’ya münhasıra olup kable’l-kısme sagīr-i mezbûr Ahmed dahi vefât edip verâseti anası mezbûre Âişe ile li-ebeveyn er karındaşı sagīr-i mezbûr Mustafa’ya ve li-ümmin er karındaşı sagīr-i mezbûr Mustafa’ya ve li-ümmin er karındaşı İsmail nâm sagīre münhasıra olup kable’l-kısme sagīr-i mezbûr Mustafa dahi vefât edip verâseti anası mezbûre Âişe ile li-ümmin er karındaşı sagīr-i mezbûr İsmail’e ve li-ebin ammi Mehmed b. Durmuş nâm kimesneye münhasıra olup kable’l-kısme sagīr-i mezbûr İsmail dahi vefât edip verâseti anası mezbûre Âişe ile babası Mustafa b. Abdullah nâm kimesneye münhasıra olup kable’l-kısme mezbûr Mehmed dahi vefât edip verâseti zevce-i metrûkesi İsmihan bt. Abdullah nâm hâtun ile kebîr oğlu olup hâlâ mahrûse-i Galata’da Yolcuzâde mahallesinde sâkin Ali nâm kimesneye münhasıra ve tashîh-i mes’eleleri bi-hükmi’l-münâsahati’ş-şer‘iyye altı bin dokuz yüz on iki sehimden i‘tibâr olunup sihâm-ı mezbûreden 3496 sehmi mezbûre Âişe Hâtun’a 1896 sehmi mezbûr Mustafa’ya 315 sehmi mezbûre İsmihan Hâtun’a 2205 sehmi mezbûr Ali’ye isâbet eylediği lede’ş-şer‘i’l-enver zâhir ve mukarrer oldukdan sonra mezbûr Ali meclis-i şer‘de işbu râfi‘u’l-kitâb mezbûr Mustafa mahzarında ikrâr ve takrîr-i kelâm edip müteveffâ-yı evvel-i mezbûr Hüseyin’in ile’l-vefât mülkü olup vefâtı hasebiyle bize mevrûs olan karye-i mezbûrede vâki‘ bir tarafdan Osman nâm kimesne mülkü ve bir tarafdan Mehmed nâm kimesne mülkü ve bir tarafdan Mustafa nâm kimesne mülkü ve bir tarafdan tarîk-i âm ile mahdûd tahtânî bir bâb oda ve bir anbar ve bir ahuru müştemil mülk menzil ile karye-i mezbûre kurbünde vâki‘ ma‘lûmü’l-hudûd üç kıt‘a mülk tarlalarda olan tashîh-i mezkûr üzere 6912 sehimden bana isâbet eden 2205 sehm hisse-i irsiyye-i şer‘iyyelerimi tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Mustafa’ya on dokuz guruşa bey‘ u temlîk eylediğimde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr on dokuz guruşu mezbûr Mustafa yedinden tamâmen ahz u kabz edip menzil-i mahdûd-ı mezkûr ile üç kıt‘a tarlalarda olan 2205 sehm hisse-i irsiyye-i şer‘iyyem mezbûr Mustafa’nın mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-ışrîn min-Şa‘bâni’l-mu‘azzam sene 1137. Şuhûdü’l-hâl: el-Hâc İbrahim b. Mehmed, el-Hâc Mustafa b. Ali, el-Hâc İbrahim b. Ahmed, Mehmed Beşe b. Osman, Halil Beşe b. Ahmed, Ali Beşe, Halil Çelebi b. Mustafa.