Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 146 Hüküm no: 118 Orijinal metin no: [16b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdünnebi’ye Süleyman b. Ali b. Abdullah’ın nafaka ödemesine karar verildiği Mahrûse-i Galata muzâfâtından kasaba-i Tophane’de Defterdâr Ebulfazl mahallesinde sâkine işbu râfi‘atü’l-vesîka Âişe bt. Abdünnebi nâm hâtun meclis-i şer‘de takrîr-i kelâm ve ta‘bîr ani’l-merâm edip zevcim gāib ani’l-beled Süleyman b. Ali b. Abdullah bundan akdem beni bilâ nafaka terk ve diyâr-ı âhara azîmet ve nafaka cinsinden bana bir nesne irsâl etmeyip nafakaya ihtiyâcım olmağın benim için zevcim gāib-i mezbûr Süleyman üzerine kıbel-i şer‘den kadr-i kifâye meblağ farz ve takdîr olunması matlûbumdur deyü iş‘âr ve hâl bâlâda tafsîl olunan minvâl üzere olduğu Mehmed Yazıcı b. Hamza ve es-Seyyid Mehmed Çelebi b. es-Seyyid Hasan nâm kimesneler ihbâr etmeleriyle hâkim-i muvakkı‘-ı a‘le’l-kitâb -rafa‘a kadrahû mevlâhü’l-vahhâb- efendi hazretleri dahi mezbûre Âişe Hâtun’u ba‘de’t-tahlîfi’ş-şer‘î mezbûre Âişe Hâtun için zevci gāib-i mezbûr Süleyman üzerine yevmî dokuz akçe farz ve takdîr eyleyip ve meblağ-ı mefrûz-ı mezkûru nafakasına harc ve sarfa ve lede’l-iktizâ istidâneye ve ınde’z-zafer zevci mezbûr Süleyman üzerine rücû‘a mezbûre Âişe Hâtun’a izin vermeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâbi‘ aşer min-Şa‘bâni’l-mu‘azzam sene 1137. Şuhûdü’l-hâl: Süleyman Efendi b. Osman, Molla İbrahim el-mukayyid, İbrahim b. Muharrem, Bekir b. Hüseyin, Mustafa b. Ahmed, Mustafa b. Mehmed, Mustafa b. Receb.