Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 147 Hüküm no: 119 Orijinal metin no: [16b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Abdülmennan’ın menzilini kocası Ahmed Çelebi b. Ali’ye sattığı Mahrûse-i Galata muzâfâtından kasaba-i Fındıklı’da Molla Çelebi mahallesinde sâkine Hadice bt. Abdülmennân b. Abdullah nâm hâtunun oğlu ve tarafından ikrâr-ı câi’z-zikre vekîli olduğu zât-ı mezbûreyi ma‘rifet-i şer‘iyye ile ârifân Mustafa Çelebi b. Mahmud ve el-Hâc Ali b. el-Hâc Mehmed nâm kimesneler şehâdetleriyle mahzar-ı hasm-ı câhidde şer‘an sâbit ve vekâletine hükm-i şer‘î lâhik olan es-Seyyid Ahmed Çelebi b. es-Seyyid Ali Çelebi nâm kimesne meclis-i şer‘de müvekkile-i mezbûre Hadice Hâtun’un hâlâ zevci olan işbu râfi‘u’l-kitâb Ahmed Çelebi b. Ali mahzarında bi’l-vekâle ikrâr ve takrîr-i kelâm edip anam müvekkile-i mezbûre akd-i âtî sudûruna değin silk-i mülkümde münselik olup mahalle-i mezbûrede vâki‘ iki tarafdan el-Hâc Abdullah veresesi mülkleri ve bir tarafdan es-Seyyid el-Hâc Mehmed veresesi mülkleri ve bir tarafdan tarîk-i âm ile mahdûd dâhiliyede fevkānî iki bâb oda ve bir sofa ve bir matbah ve bir kilâr ve el-Hâc Abdullah tarafından fevkānî bir harâb sofa ve sofa-i mezkûre tahtında üç tarafı taş ve bir tarafı tahtadan mebnâ bir harâb mahzen ve bir bi’r-i mâ ve bir kenîf ve dâhiliye-i mezkûre tahtında vâki‘ hâriciye ta‘bîr olunur fevkānî sagīr ve kebîr iki bâb oda ve dehlîz ve abdesthâne ve tahtında bir bâb ahur ve bir mahtab ve kenîfi müştemil mülk menzilini bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile zevci mezbûr Ahmed Çelebi’ye bin guruşa bey‘ u temlîk ve teslîm eyledikde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr bin guruşu zevci mezbûr Ahmed Çelebi yedinden tamâmen ahz u kabz eyleyip menzil-i mahdûd-ı mezkûrun aynına ve gabn-ı tağrîrine müte‘allika âmme-i da‘vâdan zevci mezbûr Ahmed Çelebi’nin zimmetini ibrâ ve ıskāt eyledi ba‘de’l-yevm menzil-i mahdûd-ı mezkûr bi-cümletin mâ yeştemilühû ve yahvîhi zevci mezbûr Ahmed Çelebi’nin mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ aşer min-Şa‘bâni’l-mu‘azzam sene 1137. Şuhûdü’l-hâl: İmâm İbrahim Efendi b. Ali, Müezzin Abdullah b. Ali, Müezzin Molla Mehmed b. el-Hâc Musa, el-Hâc Mustafa b. Ali, el-Hâc Mustafa b. el-Hâc Abdurrahman, el-Hâc Mehmed b. Ahmed, es-Seyyid Molla Mehmed b. es-Seyyid el-Hâc İsmail, İsmail Ağa b. Mehmed, Ahmed Çelebi b. Mehmed, İbrahim Beşe b. Hüseyin, Molla Abdurrahman b. Hasan Efendi.