Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 148 Hüküm no: 120 Orijinal metin no: [17a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Reis b. Tayyar’ın oğulları Mustafa Beşe ve Ahmed Beşe’ye hibe ettiği gemi Fi’l-asl Akçaşar-ı Bolu kazâsına tâbi‘ Kerameddin karyesi sâkinlerinden olup mahrûse-i Galata’da misâfiren sâkinler olan işbu râfi‘u’l-vesîka Mustafa Beşe ve Ahmed Beşe ibney Mehmed Reis mahfil-i şer‘-i hatîr-i lâzimü’t-tevkīrde zikri câî sefîneye vâzı‘u’l-yed olan el-Hâc Ali b. Hüseyin mahzarında üzerine da‘vâ ve takrîr-i kelâm edip mahmiye-i İstanbul’da Ayazmakapısı İskelesi’nde merbûta olan on altı zirâ‘ şayka ta‘bîr olunur sefîne ve âlât-ı mevcûde-i ma‘lûmesinin on iki sehimden on sehmi mezbûr el-Hâc Ali’nin ve bir sehmi karındaşım işbu hâzır bi’l-meclis Yusuf Beşe’nin ve bir sehmi babam olup bundan akdem fevt olan mezbûr Mehmed Reis b. Tayyar Mustafa b. Abdullah’ın iştirâken mülkleri olmağla babam müteveffâ-yı mezbûr Mehmed Reis hayâtında fevtinden yedi ay mukaddem mahmiye-i mezbûrede sefîne-i merkūme ve âlât-ı mevcûde-i ma‘lûmesinde olan on iki sehimde bir sehm hisse-i merkūmesini ale’l-iştirâki’s-seviy hibe-i sahîha-i şer‘iyye ile hibe ve teslîm edip ben dahi ber-vech-i muharrer ittihâb ve kabz ve kabûl ve tesellüm eylemişiken mezbûr el-Hâc Ali bi-gayrı hakkın zabt ve tasarruf eder suâl olunup men‘ olunması murâdımdır dediklerinde gıbbe’s-suâl mezbûr el-Hâc Ali cevâbında fi’l-vâki‘ sefîne-i merkūme ve âlât-ı mevcûdesinin ber-vech-i muharrer on sehimden bir sehm-i şâyi‘i müdde‘iyân-ı merkūmân Mustafa ve Ahmed’in babaları müteveffâ-yı mezbûr Mehmed Reis’in mülkü olduğunu ikrâr lâkin mütevffâ-yı mezbûr ber-minvâl-i muharrer hisse-i merkūmesini ale’l-iştirâki’s-seviy oğulları müdde‘iyân-ı merkūmâna hibe ve teslîm eylediğini inkâr edicek müdde‘iyân-ı mezbûrândan da‘vâ-yı mezkûrelerine muvâfıka beyyine taleb olundukda udûl-i ricâl-i Müslimînden olup mahrûse-i Galata’da sâkin âletci tâifesinden el-Hâc Mehmed b. el-Hâc Mustafa ve Tophaneli Mustafa Çelebi b. Mehmed nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Mehmed Reis b. Tayyar Mustafa b. Abdullah ber-vech-i muharrer hayâtında fevtinden yedi ay mukaddem mahmiye-i İstanbul’da Ayazmakapısı İskelesi’nde merbûta olan on altı zirâ‘ şayka ta‘bîr olunur sefîne ve âlât-ı mevcûde-i ma‘lûmesinde olan on iki sehimden bir sehm hisse-i şâyi‘asını ale’l-iştirâki’s-seviy kebîr oğulları işbu müdde‘iyân-ı mezbûrân Mustafa ve Ahmed’e bizim huzûrumuzda hibe-i sahîha-i şer‘iyye ile hibe ve teslîm edip onlardan her biri dahi ber-vech-i meşrûh ittihâb ve kabz ve tesellüm ve kabûl eylediler biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye makbûle olmağın mûcebiyle müdde‘iyân-ı mezbûrânın sefîne-i merkūme ve âlât-ı mevcûde-i ma‘lûmesinde olan on iki sehimde bir sehm hisse-i mevhûbe-i merkūmelerini kendülere teslîme mezbûr el-Hâc Ali’ye tenbîh birle mâ-hüve’l-vâkı‘ bi’l-ibtigā ketb olundu. Fi’l-yevmi’s-sâbi‘ aşer min-Şa‘bâni’l-mu‘azzam sene 1137. Şuhûdü’l-hâl: Ahmed Efendi b. Süleyman, Süleyman Efendi b. Osman, Mehmed b. Ahmed, Ali Bey b. Abdullah, Yusuf b. Abdullah ve gayrühum.