Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 149 Hüküm no: 121 Orijinal metin no: [17a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Süleyman Kapudan ile es-Seyyid Mustafa Kapudan’ın yarı hissesi kendilerine düşen gemi ile alet ve eşyaları el-Hâc Ahmed Ağa’ya sattıkları Husûs-ı âti’l-beyânın mahallinde ketb u tahrîri iltimâs olunmağın savb-ı şer‘-i enverden mevlânâ Halil Efendi b. Hüseyin me’zûnen irsâl olunup ol dahi mahrûse-i Galata hısnı ebvâbından Eskiyağkapanı İskelesi’nde vâki‘ Balıkhâne’ye varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf-i nebevî eyledikde tüccâr kalyonları kapudanlarından karındaşlar olan es-Seyyid Süleyman Kapudan ve es-Seyyid Mustafa Kapudan ibney Şerif Hüseyin meclis-i ma‘kūd-ı mezbûrda Sarây-ı Hümâyûn pazarbaşısı olan umdetü’l-emâcid ve’l-ekârim işbu sâhibü’l-kitâb el-Hâc Ahmed Ağa b. el-Hâc Mehmed mahzarında her biri ikrâr ve takrîr-i kelâm edip akd-i âtî sudûruna değin ale’l-iştirâki’s-seviy yedimizde mülkümüz olup mahrûse-i Galata[‘da] Balıkpazarı İskelesi’nde merbûta örf-i mellâhînde kalyon ta‘bîr olunur kırk iki buçuk zirâ‘ sefîne ile içinde olan otuz dört aded demir top ma‘a takım ve dört demir ve üç gomana ve üç gomanata ve bir takım cedîd yelken ve dört plakon ve iki tente ve iki parsiye ve demir çenberli otuz varil ve yine demir çenberli on iki mançine-i âb ve on iki nühâs karavan ve iki nühâs kazgan ve kebîr ve sagīr dört nühâs zift kazganı ve takımıyla bin sandal ve bir filika ve bir harîr sancak ve iki kırmızı sancak ve otuz varil barut ve üç bin demir yuvalak ve yüz demir pilankete ve seksen demir mikrâz ve âlât-ı sâirenin nısf-ı şâyi‘i tarafeynden îcâb ve kabûlü hâvî bey‘-i bâtt-ı sahîh-i şer‘î ile mûmâ-ileyh el-Hâc Ahmed Ağa’ya yedi bin beş yüz guruşa bey‘ u teslîm eylediğimizde ol dahi ber-vech-i muharrer iştirâ ve tesellüm ve kabz ve kabûl eyledikden sonra semeni olan meblağ-ı mezbûr yedi bin beş yüz guruşu her birimiz bi-kadri’l-hısas müşterî-i mûmâ-ileyh el-Hâc Ahmed Ağa yedinden tamâmen ahz u kabz eyledik ba‘de’l-yevm sefîne-i merkūme ve âlât-ı mevcûdenin nısf-ı şâyi‘i mûmâ-ileyh el-Hâc Ahmed Ağa’nın mülk-i müşterâsı olmuşdur keyfe mâ yeşâ ve yahtâr mutasarrıf olsun dediklerinde gıbbe’t-tasdîki’ş-şer‘î vâki‘ hâli mevlânâ-yı mezkûr mahallinde ketb ü tahrîr ve ma‘an ba‘s olunan Sarrâc Yusuf b. Abdullah ve Serbölük Halil Çelebi b. Mustafa ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâbi‘ aşer min-Şa‘bâni’l-mu‘azzam sene 1137. Şuhûdü’l-hâl: İzmirlizâde es-Seyyid Mustafa b. el-Hâc İbrahim, Nalbur el-Hâc Abdurrahman b. İsmail, Kozikazâde Hüseyin Kapudan b. Halil, Rodosi Mehmed Kapudan b. Ali, el-Hâc Veli b. Ali b. Abdullah, Burusi Mustafa Hoca b. Süleyman, el-Hâc Mehmed b. el-Hâc İsmail Hoca, Silistreli es-Seyyid el-Hâc Mustafa b. Hüseyin, İplikci el-Hâc Mehmed b. Abdullah, Muameleci el-Hâc Ahmed b. İbrahim, Bakkal el-Hâc Ali b. Mehmed, Hüseyin Yazıcı b. Abdullah, Kadızade Ali Çelebi b. Muharrem Efendi, Ahmed Çelebi b. Mustafa, Halil Çelebi b. Mustafa.