Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 786 Hüküm no: 1028 Orijinal metin no: [122a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Dede b. Abdullah’ın terekesinin vârisler arasında paylaşılması Vilâyet-i Rumeli’nde Avlonya kazâsına tâbi‘ Esfer nâm karye ahâlîsinden Hacı Hasan ve Aydın Beşe ibney Mehmed nâm kimesneler meclis-i şer‘de fi’l-asl karye-i mezbûre ahâlîsinden olup bundan akdem mahmiye-i İstanbul’da Topkapısı dâhilinde sâkin iken vefât eden Ali Dede b. Abdullah’ın zevce-i metrûkesi ve vâlidesi olup terekesine vâzı‘atü’l-yed olan Temenna bt. Abdullah nâm hâtun mahzarında her biri üzerine da‘vâ ve takrîr-i kelâm edip babamız mezbûr Mehmed ile müteveffâ-yı mezbûr li ebeveyn karındaşlar olup babaları ismi Abdullah ve anaları ismi Maro ve dedeleri ismi Piyo ve maskat-ı re’sleri karye-i mezbûre olup müteveffâ-yı mezbûrun verâseti mezbûre Temenna ile bize münhasıra olup gayrı vârisi yoğiken mezbûre Temenna tereke-i müteveffâ-yı mezbûrdan sekiz sehimden altı sehim hissemizi bize teslîmden imtinâ‘ eder suâl olunup ihkāk-ı hak olunmak matlûbumuzdur dediklerinde gıbbe’s-suâl ve’l-inkâr müdde‘iyân-ı mezbûrândan müdde‘âlarını mübeyyine beyyine taleb olundukda kazâ-i mezbûra tâbi‘ Kokanos nâm karye ahâlîsinden Ali b. Mehmed ve aslında vilâyet-i mezbûrda Arnavud Belgradı kasabasında Vakıf mahallesi ahâlîsinden olup hâlâ mahmiye-i mezbûrda Yeni Odalar kurbunda sâkin Yakub b. Mehmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘iyân-ı mezbûrânın babaları mezbûr Mehmed ile müteveffâ-yı mezbûr li ebeveyn karındaşlar olup babaları ismi Abdullah ve anaları ismi Maro ve dedeleri ismi Piyo ve maskat-ı re’sleri karye-i mezbûre olup müteveffâ-yı mezbûrun verâseti müdde‘iyân-ı mezbûrân ile mezbûre Temenna’ya münhasıradır gayrı vârisi ve terekesine müstahıkk-ı âhar olduğu ma‘lûmumuz değildir biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olup mûcebince müdde‘iyân-ı mezbûrânın verâsetine hükm olundukdan sonra tereke-i müteveffâ-yı mezbûrdan sekiz sehimden altı sehim hisselerini müdde‘iyân-ı mezbûrâna teslîme mezbûre Temenna’ya tenbîh olunmağın mâ vaka‘a bi’t-taleb ketb olundu. Fi’l-yevmi’l-âşir min Şevvâli’l-mükerrem li sene seb‘a ve seb‘în ve elf Şuhûdü’l-hâl: Veli Bey b. Mahmud, Hasan Çelebi b. Ahmed, çukadâr Hasan Beşe, İbrahim Çelebi b. Ahmed, Mustafa b. Ahmed.