Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 787 Hüküm no: 1029 Orijinal metin no: [122a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gülizar bt. Abdullah’ın kendisi ölene kadar işlerini görmeye taahhüt eden Hüseyin b. Muharrem’e ev eşyalarını hibe ettiği Mahmiye-i İstanbul’da Karekî mahallesi sâkinelerinden Gülizar bt. Abdullah nâm hâtun tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Hoca Mehmed Efendi b. Abdülkādir ve Mehmed Çelebi b. Habib nâm kimesneler şehâdetleri ile şer‘an sâbit olan Hasan Bey b. Mehmed nâm kimesne meclis-i şer‘-i şerîf-i lâzımü’t-teşrîfde bâ‘isü’l-kitâb Hüseyin b. Muharrem nâm kimesne mahzarında ikrâr ve takrîr-i kelâm edip müvekkilem mezbûre Gülizar mezbûr Hüseyin’in menzilinde sâkine olup ihsânını görmek ile emlâkinden üç köhne yemeni yorgan ve bir beledî döşek ve üç köhne alaca bez yastık ve iki köhne minder ve bir köhne muhayyer ferâce ve bir ipek alacası kaftan ve iki tencere ve bir köhne güğüm ve bir don sîm kemer kuşağını ve iki sahanını kendi ölünce menzilinde iskân edip görüp gözetip beslemek üzre mezbûr Hüseyin’e hibe ve teslîm edip mezbûr Hüseyin dahi vech-i muharrer üzre ittihâb ve tesellüm ettiğinden sonra beş yüz akçesini mezbûre Gülizar’a hibe-i mezbûresinden ivaz olmak üzre hibe ve teslîm edip mezbûre Gülizar dahi vech-i muharrer üzre meblağ-ı mezbûru ittihâb ve tesellüm eyledi dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’l-âşir min Şevvâli’l-mükerrem li sene seb‘a ve seb‘în ve elf. Şuhûdü’l-hâl: İmâm Ömer Efendi [b.] Osman, Halil b. Osman, Ali Halîfe b. el-Kayyım, Himmet b. Şaban, Yusuf Çelebi b. Abdullah.