Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 151 Hüküm no: 123 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Mahmud b. Hüseyin’in babasına kefil olan İstarati v. Yorgaki ile sulh oldukları Mahmiye-i İstanbul’da Gülcâmi‘-i Şerîfi mahallesinde sâkin kömürcü tâifesinden el-Hâc Mahmud b. Hüseyin nâm kimesne meclis-i şer‘de işbu râfi‘u’r-rakīm İstarati v. Yorgaki nâm zimmî muvâcehesinde ikrâr ve takrîr-i kelâm edip merkūm İstarati’nin babası olup bundan akdem hâlik Yorgaki nâm zimmî zimmetinde ber-mûceb-i temessük karz-ı şer‘îden cem‘an altmış beş buçuk guruş hakkım olup ve merkūm İstarati meblağ-ı mezbûra tarafeynden emir ve kabûlü hâviye kefâlet-i sahîha-i şer‘iyye ile kefîl olmağın meblağ-ı mecmû‘-ı mezbûr altmış beş buçuk guruşu kefâletine binâen merkūm İstarati’den ba‘de’d-da‘vâ ve’l-inkâr beynimize muslihûn tavassut edip da‘vâ-yı mezkûremden merkūm İstarati ile beni otuz iki guruş üzerine inşâ-i akd-i sulh eylediklerinde ben dahi ber-vech-i muharrer sulh-i mezbûru kabûl ve bedel-i sulh olan meblağ-ı mezbûr otuz iki guruşu yine meclis-i şer‘de merkūm İstarati yedinden tamâmen ahz u kabz eylediğimden sonra mâ‘adâsı olan otuz üç buçuk guruşuna müte‘allika âmme-i da‘vâdan merkūm İstarati ile verese-i sâiresinin zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ aşer min-Şa‘bâni’l-mu‘azzam sene 1137. Şuhûdü’l-hâl: el-Hâc Abdullah b. Mustafa, Ali Çelebi b. İsmail, Mustafa Efendi b. Mehmed, Ahmed Efendi b. Ahmed, Süleyman Efendi b. Osman.