Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 152 Hüküm no: 124 Orijinal metin no: [17b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Çelebi b. Mehmed’in müşterek menzilini kız kardeşi Rukiye bt. Mehmed’e sattığı Mahrûse-i Galata’da Yolcuzâde mahallesinde sâkin Abdullah Çelebi b. Mehmed nâm kimesne meclis-i şer‘-i hatîr-i lâzimü’t-tevkīrde li-ebeveyn kız karındaşı Rukiye bt. Mehmed b. Sefer nâm hâtun tarafından bey‘-i âti’z-zikri tasdîke sâbitü’l-vekâle vekîli olan işbu râfi‘u’l-kitâb Ahmed Kapudan b. Mustafa nâm kimesne mahzarında ikrâr ve takrîr-i kelâm edip mahrûse-i mezbûre a‘mâlinden kasaba-i Kasımpaşa’da el-Hâc Hüsrev mahallesinde vâki‘ bir tarafdan Tâcir İbrahim Çelebi menzili ve bir tarafdan Molla Mehmed menzili ve bir tarafdan Battal Ahmed menzili ve bir tarafdan tarîk-i hâs ile mahdûd fevkānî bir bâb oda ve bir sagīr sofa ve abdesthâne ve tahtânî üç bâb oda ve bir sofa ve kenîf ve bi’r-i mâ ve bir mikdâr bahçeyi müştemil mülk menzilin nısf-ı şayi‘i benim ve nısf-ı şâyi‘-i âharı karındaşım müvekkile-i mezbûre Rukiye Hâtun’un olmağın ben dahi nısf hisse-i mezkûremi tarafeynden îcâb ve kabûlü hâvî bey‘-i bâtt-ı sahîh-i şer‘î ile kız karındaşım müvekkile-i mezbûre Rukiye Hâtun’a on beş guruşa bey‘ u temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr on beş guruşu kız karındaşım müvekkile-i mezbûre Rukiye Hâtun yedinden tamâmen ahz u kabz eyledim ba‘de’l-yevm menzil-i mahdûd-ı mezkûrun mecmû‘u bi-cemî‘i mâ yeştemilühû ve yahvîhi kız karındaşım müvekkile-i mezbûre Rukiye Hâtun’un mülkü olup benim kat‘an alâka ve medhalim kalmamışdır keyfemâ teşâ ve tahtâr mutasarrıfa olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis ve’l-ışrîn min-Şa‘bâni’l-mu‘azzam sene 1137. Şuhûdü’l-hâl: Hüseyin Beşe b. Mustafa, Ali Beşe b. Mustafa, Mehmed Beşe b. Ahmed, Ali Beşe b. Receb, balıkcı Mehmed b. Ahmed.