Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 152 Hüküm no: 125 Orijinal metin no: [17b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife bt. Hüseyin’in Ömer Beşe b. Mehmed’den muhalaa ile boşandığı Mahrûse-i Galata’da Emekyemez mahallesinde sâkin ve zâtı Murad Bey b. İvaz ve Mustafa Beşe b. Receb ta‘rîfleriyle mu‘arrefe olan Afife bt. Hüseyin nâm hâtun meclis-i şer‘de zevc-i muhâlı‘ı işbu râfi‘u’l-vesîka Ömer Beşe b. Mehmed nâm kimesne mahzarında bi-tav‘ihâ ikrâr ve takrîr-i kelâm edip zevcim mezbûr Ömer Beşe ile beynimizde adem-i hüsn-i mu‘âşeretden nâşî hul‘a tâlibe ve râgıbe olduğum ecilden zimmetinde mütekarrır ve ma‘kūdün-aleyh olan on bin akçe mehr-i mü’eccelimden fâriğa olup nafaka-i iddet ve me’ûnet-i süknâm dahi kendi üzerime olup ve mezbûr zimmetinde cihet-i karz-ı şer‘îden hakkım olan dokuz buçuk guruş dahi bedel-i hul‘ olmak üzere zevcim mezbûr Ömer ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru ba‘de’l-kabûl hukūk-ı zevciyyete müte‘allika da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sânî ve’l-ışrîn min-Şa‘bâni’l-mu‘azzam sene 1137. Şuhûdü’l-hâl: Mustafa b. Mehmed, Bayrakdar Hüseyin Beşe, Hüseyin b. Abdullah, es-Seyyid Mustafa b. es-Seyyid Mustafa, Mustafa b. Receb.