Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 153 Hüküm no: 126 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haffaf el-Hâc Mustafa b. Ahmed ile es-Seyyid Mehmed Emin’in ortak oldukları şirketi feshettikleri Mahrûse-i Galata’da Câmi‘-i Kebîr mahallesinde sâkin Haffâf el-Hâc Mustafa b. Ahmed nâm kimesne meclis-i şer‘de mahrûse-i mezbûrede Haffâflar sûkında vâki‘ haffâf dükkânında şerîki olan işbu râfi‘u’l-kitâb es-Seyyid Mehmed Emin b. es-Seyyid Ahmed mahzarında ikrâr ve takrîr-i kelâm edip târih-i kitâbdan dört buçuk sene mukaddem dükkân-ı mezbûr içinde olan eşyâ-i ma‘lûmemi kethudâ ve yiğitbaşı vesâir ihtiyâr ustalar tahmînleriyle yirmi dört bin üç akçeye tahmîn olundukdan sonra eşyâ-i ma‘lûmeyi âhara bey‘ ve hâsıl olan fâidesi beynimizde munâsafeten iktisâm olunmak üzere mezbûr es-Seyyid Mehmed Emin ile akd-i şirket eyleyip ve târih-i kitâba gelince dört senede hâsıl olan fâidesini bana yüz guruşa def‘ u teslîm etmiş idi hâlen mezbûr es-Seyyid Mehmed Emin dükkân-ı mezbûr içinde mevcûd olan eşyâ yine yiğitbaşı ve kethudâ vesâire ustalar ma‘rifetiyle takvîm ve tahmîn olundukda cem‘an kıymetleri yirmi altı bin dokuz yüz on dokuz akçeye bâliğ olmağla eşyâ-i mevcûde-i merkūmeyi ahz u kabz edip ve mezbûr es-Seyyid Mehmed Emin’in ba‘zı kimesnelere olan kırk üç guruş deyninin yirmi dört guruşunu ben mâlımdan edâ eyleyip ve on dokuz guruşunu kendi edâ eylemek üzere bi’t-terâhî beynimizde fesh-i şirket eylediğimizden sonra şirket-i mezbûreye müte‘allika âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis ve’l-aşer min-Şa‘bâni’l-mu‘azzam sene 1137. Şuhûdü’l-hâl: el-Hâc Hüseyin b. Mehmed haffâf, Mustafa Çelebi b. İlyas haffâf, Mehmed Çelebi b. Murad haffâf, el-Hâc Mehmed b. Abdullah, Abdullah Çelebi, el-Hâc Mustafa.