Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 154 Hüküm no: 127 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hammami el-Hâc Salih b. Yusuf ile Hanife bt. Ali’nin vârislerinden Rukiye, Ayşe ve Fatıma’nın hisselerini İzmirli el-Hâc İsmail’e sattıkları Mahrûse-i Galata muzâfâtından kasaba-i Tophane’de Muhyiddin Efendi mahallesinde sâkin iken bundan akdem vefât eden Hammâmî el-Hâc Salih b. Yusuf b. Abdullah’ın verâseti zevce-i metrûkesi Hanife bt. Ali b. Abdurrahman ile sulbiye kebîre kızları Fâtıma ve Rukiye nâm hâtunlara münhasıra olup kable’l-kısme mezbûre Hanife dahi müteveffiye olup verâseti sadriye kebîre kızları Âişe ve diğer Fâtıma bintey Ali Kapudan b. Mustafa nâm hâtunlara münhasıra ve tashîh-i meseleleri bi-hükmi’l-münâsahati’ş-şer‘iyye on altı sehimden i‘tibâr olunup sihâm-ı mezbûreden yedişer sehmi mezbûretân Fâtıma ve Rukiye’ye ve birer sehmi mezbûretân Âişe ve diğer Fâtıma’dan her birine isâbet eylediği lede’ş-şer‘i’l-enver zâhir ve mukarrer oldukdan sonra zâtı zevci el-Hâc Hasan b. Abdullah ve Halil Çelebi b. Mustafa nâm kimesneler ta‘rîfleriyle mu‘arrefe olan mezbûre Rukiye Hâtun asâleten ve mezbûretân Âişe ve diğer Fâtıma taraflarından bey‘-i âti’z-zikre vekîli olduğu mezbûretânın zâtlarını ma‘rifet-i şer‘iyye ile ârifân el-Hâc Hasan b. Abdurrahman ve Osman Bey b. Abdullah nâm kimesneler şehâdetleriyle mahzar-ı hasm-ı câhidde şer‘an sâbit ve vekâletine hükm-i şer‘î lâhik olan Ali Ağa b. el-Hâc Mustafa nâm kimesne vekâleten meclis-i şer‘de işbu sâhibü’l-kitâb İzmirli el-Hâc İsmail b. Abdurrahman nâm kimesne mahzarında her biri bi’l-asâle ve bi’l-vekâle ikrâr ve takrîr-i kelâm edip müteveffâ-yı evvel-i mezbûr Hammâmî el-Hâc Salih’in terekesinden olup kasaba-i mezbûreye tâbi‘ Hüseyin Ağa mahallesinde vâki‘ bir tarafdan Haseki Ahmed Ağa mülkü ve iki tarafdan merhûm el-Hâc İbrahim Vakfı olup bostancıbaşı-i sâbık Ahmed Ağa evlâdları tasarruflarında olan menzil ve bir tarafdan tarîk-i âm ile mahdûd fevkānî beş bâb oda ve bir sofa ve bir kenîf ve tahtânî üç bâb oda ve bir kilâr ve bir bi’r-i mâ ve eşcâr-ı müsmire ve gayr-i müsmireli bahçeyi müştemil Frenghâne ta‘bîr olunur mülk menzilde tashîh-i mezkûr üzere bize isâbet eden dokuz sehm hisse-i irsiyye-i şer‘iyyemizi tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûrel-Hâc İsmail’e bi’l-asâle ve bi’l-vekâle altı yüz yetmiş beş guruşa bey‘ u temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabûl eylediklerinden sonra semeni olan meblağ-ı mezbûr altı yüz yetmiş beş guruşu mezbûr el-Hâc İsmail yedinden bi-kadri’l-hısas tamâmen ahz u kabz eyledik ba‘de’l-yevm menzil-i mahdûd-ı mezkûrda olan dokuz sehm hisse-i irsiyyemiz mezbûr el-Hâc İsmail’in mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’r-râbi‘ ve’l-ışrîn min-Şa‘bâni’l-mu‘azzam sene 1137. Şuhûdü’l-hâl: el-Hâc Ali b. Ahmed, el-Hâc Yusuf b. Ahmed, Hammâmî el-Hâc İbrahim b. Mustafa, el-Hâc Mustafa b. el-Hâc Mehmed, el-Hâc Ahmed b. Mehmed, el-Hâc Mustafa b. Ahmed.