Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 155 Hüküm no: 128 Orijinal metin no: [18a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Toma bt. Velisar’ın menzilini kocası Kiryako v. Praşkova’ya sattığı Mahrûse-i Galata a‘mâlinden İstinye nâhiyesine tâbi‘ Karye-i Cedîd’de Hızır İlyas mahallesinde mütemekkine ve şahsı Kostantin v. Kiryako ve Yani v. Sava nâm zimmîler ta‘rîfleriyle mu‘arrefe olan Toma bt. Velisar nâm Nasrâniye meclis-i şer‘de işbu hâmilü’r-rakīm zevci Kiryako v. Praşkova nâm zimmî muvâcehesinde bi-tav‘ihâ ikrâr ve takrîr-i kelâm edip akd-i âtî sudûruna değin silk-i mülkümde münselik olup mahalle-i mezbûrede vâki‘ bir tarafdan yine benim âhar mülküm ve bir tarafdan Cankaluoğlu Dimitri mülkü ve bir tarafdan Kanaki mülkü ve taraf-ı râbi‘den tarîk-i âm ile mahdûd bir bâb kebîr oda ve mahzen ve bir mikdâr havluyu müştemil mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î [ile] zevcim merkūm Kiryako’ya bey‘ u teslîm eylediğimde ol dahi ber-vech-i muharrer ba‘de’l-iştirâ ve’t-tesellüm ve’l-kabûl semeni olan meblağ-ı mezbûr yüz guruşu müşterî-i mezbûr yedinden tamâmen ahz u kabz eyledim ba‘de’l-yevm menzil-i mahdûd-ı mezbûr bi-cemî‘i mâ yeştemilühû ve yahvîhi zevcim mezbûr Kiryako’nun mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis ve’l-ışrîn min-Şa‘bâni’l-mu‘azzam sene 1137. Şuhûdü’l-hâl: Serbölük Halil Ağa, Bursalı Muhzır Mehmed, Alûfte Mehmed, Muhzır Ali Bey, Praşkova v. Nasr, Fantezi v. Kiryako, Sava v. İstanbul.