Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 156 Hüküm no: 130 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Beşe b. Ahmed’in kendisini darb eden Hüseyin Beşe b. Abdi ile sulh olduğu Mahrûse-i Galata muzâfâtından kasaba-i Fındıklı’da İbrahim Efendi mahallesinde sâkin Mustafa Beşe b. Ahmed nâm kimesne meclis-i şer‘de kasaba-i mezbûrede vâki‘ hamâm dellâklarından olup hâlâ Muhzır Ağa habsinde olan Hüseyin Beşe b. Abdi b. Abdullah nâm kimesne tarafından zikri âtî sulh ve ibrâya vekîli olduğu es-Seyyid Mustafa Çelebi b. Süleyman ve Molla Osman b. Hasan nâm kimesneler şehâdetleriyle sâbit olan işbu râfi‘u’l-kitâb Hasan Beşe b. Ahmed nâm kimesne mahzarında ikrâr ve takrîr-i kelâm edip müvekkil-i mezbûr Hüseyin Beşe târih-i kitâbdan dört gün mukaddem ba‘de’z-zuhr Tophane’de iskele başında sol gözüm üzerinden ve sol pazumdan üç yerimden amden bi-gayrı hakkın palloş ta‘bîr olunur âlet-i câriha ile darb ve cerh eylediğini bundan akdem Tophane mahkemesinde isbât ve i‘lâmıyla mezbûr Hüseyin Beşe’yi ber-vech-i muharrer habs etdirmişdim el-hâletü hâzihî beynimize muslihûn tavassut edip beni da‘vâ-yı mezkûremden vekîl-i mezbûr Hüseyin Beşe ile yirmi guruş üzerine inşâ-i akd-i sulh eylediklerinde ben dahi ber-vech-i muharrer sulh-i mezbûru kabûl ve bedel-i sulh olan meblağ-ı mezbûr yirmi guruşu vekîl-i mezbûr Hüseyin Beşe yedinden tamâmen ahz u kabz eylediğimden sonra cerh-i mezbûra ve mâ yahdesü anhuya müte‘allika âmme-i da‘vâdan müvekkil-i mezbûr Hüseyin Beşe’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde vekîl-i mezbûr dahi bedel-i sulh olmak üzere bana medfû‘u olan meblağ-ı mezbûr yirmi guruşa müte‘allika âmme-i da‘vâdan kezâlik benim zimmetimi ibrâ ve ıskāt eyledi dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ ve’l-ışrîn min-Şa‘bâni’l-mu‘azzam sene 1137. Şuhûdü’l-hâl: Veli Beşe b. İbrahim, İbrahim Beşe b. Hasan, Hüseyin Beşe b. Mehmed, Ebûbekir Beşe b. Ahmed, Mustafa Beşe b. Abdullah, Molla Osman b. Osman.