Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 156 Hüküm no: 131 Orijinal metin no: [18b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Mustafa b. Hüseyin ile Mehmed Çelebi’nin iki kalyon hissesini diğer ortakları es-Seyyid Süleyman Kaptan ile es-Seyyid Mustafa Kaptan’a sattıkları Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘-i enverden mevlânâ Halil Efendi b. Hüseyin me’zûnen irsâl olunup ol dahi mahrûse-i Galata hısnı ebvâbından Eski Yağkapanı İskelesi’nde vâki‘ balıkhâneye varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf-i nebevî eyledikde cezîre-i Rodos ahâlîsinden olup kendi tarafından asîl ve yine cezîre-i mezbûre sâkinlerinden Mehmed Çelebi b. el-Hâc Emrullah b. Abdullah kıbelinden vech-i âtî üzere zikirleri câî kalyon ve âlât-ı mevcûdesinde olan rub‘ hissesi âhara bey‘ ve semeni ahz u kabz ve kendüye îsâl ve ibrâya ve umûr-ı mezkûra mütevakkıf olduğu sâir husûsların küllîsine vekîl olduğu cezîre-i merkūme sâkinlerinden Kurbağazâde Hüseyin Kapudan b. Halil ve Mehmed Kapudan b. Ali şehâdetleriyle mahzar-ı hasm-ı câhidde şer‘an sâbit ve vekâletine hükm-i şer‘î lâhik olan el-Hâc Mustafa b. Hüseyin meclis-i ma‘kūd-ı mezbûrda karındaşlar olan işbu râfi‘u’l-vesîka es-Seyyid Süleyman Kapudan ve es-Seyyid Mustafa Kapudan ibney Şerif Hüseyin mahzarlarında bi’l-asâle ve bi’l-vekâle ikrâr ve takrîr-i kelâm edip akd-i âtî sudûruna değin mahrûse-i Galata’da Balıkpazarı İskelesi’nde merbût örf-i mellâhînde kalyon ta‘bîr olunur kırk iki buçuk zirâ‘ sefîne derûnunda mevcûde olan otuz dört aded demir top ma‘a takım ve dört demir ve üç gomana ve üç gomanata ve bir takım yelken-i cedîd ve dört plakon ve iki tente ve iki parsiye ve demir çenberli ve otuz varil ve yine demir çenberli on iki su mançinesi ve on iki nühâs karavana ve iki nühâs kazgan ve kebîr ve sagīr dört nühâs zift kazanı ve takımlarıyla bir sandal ve bir filika ve bir harîr sancak ve iki kırmızı sancak ve otuz varil barut ve üç bin demir yuvalak ve yüz demir plankete ve seksen demir mikrâz ve âlât-ı sâirenin dört sehimden bir sehm-i şâyi‘i benim ve bir sehm-i şâyi‘i müvekkile-i mezbûr Mehmed Çelebi’nin ve iki sehm-i şâyi‘i ale’l-iştirâki’s-seviy mezbûrân es-Seyyid Süleyman Kapudan ve es-Seyyid Mustafa Kapudân’ın mülkleri olmağın hâlâ müvekkil-i mezbûr Mehmed Çelebi ile sefîne-i merkūme ve âlât-ı mevcûde-i merkūmesinde olan dört sehimden iki sehm hisse-i şâyi‘a-i merkūmemizi asâlet ve vekâlet-i mahkiyem hasebiyle tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûrân es-Seyyid Süleyman Kapudan ve es-Seyyid Mustafa Kapudan’a iştirâki’s-seviy üzere yedi bin guruşa bey‘ u teslîm eylediğimde onlar dahi ber-vech-i muharrer iştirâken iştirâ ve tesellüm ve kabûl eyleyip ve semen-i merkūm yedi bin guruşu müşteriyân-ı mezbûrân yedlerinden bi’l-asâle ve bi’l-vekâle tamâmen alıp kabz eyledikden sonra sefîne-i merkūmenin hâsıl olan kalîl ü kesîr navl ve masârıfına ve târih-i kitâba gelince sâir beynimizde cereyân eden ahz u i‘tâ ve mu‘âmelât-ı şettâya müte‘allika âmme-i da‘vâdan mezbûrân es-Seyyid Süleyman Kapudan ve es-Seyyid Mustafa Kapudan ile her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîki’ş-şer‘î vâki‘ hâli mevlânâ-yı mezkûr mahallinde ketb ü tahrîr ve ma‘an ba‘s olunan Çukadâr Yusuf b. Abdullah ve Serbölük Halil b. Mustafa ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis aşer min-Şa‘bâni’l-mu‘azzam sene 1137. Şuhûdü’l-hâl: İzmirlizâde es-Seyyid Mustafa b. el-Hâc İbrahim, Kozikazâde Hüseyin Kapudan b. Halil, Rodosi Mehmed Kapudan b. Ali, Rodosi Mustafa Hoca b. Süleyman, Hammâmî el-Hâc Veli Ağa b. Abdullah, el-Hâc Mehmed b. İsmail, Silistreli es-Seyyid el-Hâc Mustafa, İplikci el-Hâc Mehmed, Muameleci el-Hâc Ahmed, Bakkal el-Hâc Mehmed, Hüseyin Yazıcı, Kadızade Ali b. Muharrem Efendi, Ahmed b. Mustafa.