Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 788 Hüküm no: 1030 Orijinal metin no: [122a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe Hatun bt. Ali’nin, Abdullah Bey b. Musa Paşa’dan muhâlaa yoluyla boşandığı Husûs-ı âti’l-beyânın mahallinde tahrîri iltimâs olunmağın savb-ı şer‘-i lâzımü’t-tebcîlden mevlânâ Ömer Efendi b. İsmail irsâl olunup ol dahi mahmiye-i İstanbul’da Ayasofya-i Kebîr hareminde vâki‘ umdetü’l-ümerâ Abdullah Bey b. Musa Paşa’nın menziline varıp zeyl-i rakīmde isimleri terkīm olunan müslimîn mahzarında akd-i meclis-i şer‘-i mübîn eyledikde mûmâ-ileyh Abdullah Bey’in zevce-i menkûhası Âişe Hâtun bt. Ali zâtını ma‘rifet-i şer‘iyye ile ârifân Aksaray’da Molla Gürânî mahallesi sâkinlerinden el-Hâc Hüseyin b. el-Hâc Yusuf ve Ayasofya-i Kebîr mahallesi sâkinlerinden Mehmed Ağa b. Hasan Halîfe nâm kimesneler ta‘rîfleriyle mu‘arrefe oldukdan sonra meclis-i ma‘kūd-ı mezbûrdan zevc-i dâhilün-bihâsı müşârün-ileyh Abdullah Bey mahzarında bi’t-tav‘i’s-sâf ikrâr ve i‘tirâf edip zevcim mûmâ-ileyh Abdullah Bey ile zimmetinde mütekarrir ve ma‘kūdun-aleyh elli bin akçe mehr-i müeccel-i müsemmâm ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzre muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra târih-i kitâba gelince zevciyyete ve gayra müte‘allika âmme-i de‘âvî ve mütâlebâtdan her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik dedikde gıbbe’t-tasdîki’l-vicâhî ve’t-tahkīki’ş-şifâhî husûs-ı mezbûru mevlânâ-yı mezbûr mahallinde tahrîr ve ba‘dehû ma‘an irsâl olunan Ahmed Çelebi b. Sunullah ve Veli Bey b. Receb ile meclis-i şer‘-i hatîre gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb ve imlâ olundu. Fi’l-yevmi’l-âşir min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Umdetü’l-emâsil ve’l-ekfâ Bayram Ağa b. Cafer Rumeli Ağası hâlâ, umdetü’l-eimme Mehmed Efendi b. Mustafa Efendi imâm-ı câmi‘-i şerîf-i Ayasofya-i Kebîr hâlâ, Hasan Bey b. Abdullah, Kaytas Bey b. Abdullah, Yusuf Bey [b.] Abdullah.