Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 158 Hüküm no: 132 Orijinal metin no: [18b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Reis b. Mehmed’in Ahmed Çelebi b. Abdullah’a olan borcunu terekesinden vârislerinin ödemesi gerektiği Mahrûse-i Galata’da Câmi‘-i Kebîr mahallesinde sâkin iken bundan akdem vefât eden İsmail Reis b. Mehmed b. Abdullah’ın verâseti zevce-i metrûkesi Fâtıma bt. Şa‘ban nâm hâtun ile sulbiye sagīre kızı Âişe’ye ve li-ebeveyn kız karındaşları Emine ve diğer Âişe’ye münhasıra ve mezbûre Fâtıma dahi sagīre-i mezbûre Âişe’nin tesviye-i umûruna kıbel-i şer‘den mansûb vasîsi olduğu lede’ş-şer‘i’l-enver zâhir ve mukarrer oldukdan sonra mahmiye-i İstanbul’da Cibalikapısı dâhilinde Karanlık Mescid mahallesinde sâkin işbu râfi‘u’l-kitâb Ahmed Çelebi b. Abdullah nâm kimesne meclis-i şer‘de tereke-i müteveffâ-yı mezbûre vaz‘-ı yedleri zâhir olan mezbûrât Fâtıma ve Emine ve diğer Âişe mahzarlarında üzerlerine da‘vâ ve takrîr-i kelâm edip yedimde olan işbu deyn temessükü nâtık olduğu üzere müteveffâ-yı mezbûr İsmail Reis zimmetinde hayâtında târih-i kitâbdan bir sene mukaddem yedimden iştirâ ve kabz eylediği 440 vakiyye kettân bahâsından [19a] yüz guruş hakkım olup meblağ-ı mezbûru tereke-i müteveffâ-yı mezbûrdan alıverilmesi murâdımdır dedikde gıbbe’s-suâl ve akībe’l-inkâr müdde‘î-i mezbûrdan ber-vech-i muharrer müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden mahmiye-i İstanbul’da Haydarpaşa mahallesinde sâkin Mehmed Reis b. Mehmed ve Galata’da Kürkçükapısı hâricinde Makaracı Mehmed odalarında sâkin Süleyman Reis b. Mustafa nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müteveffâ-yı mezbûr İsmail Reis b. Mehmed b. Abdullah hayâtında târih-i kitâbdan bir sene mukaddem ber mûceb-i temessük müdde‘î-i mezbûra ber-vech-i muharrer kettân bahâsından zimmetinde yüz guruş deyni olduğunu ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın ve mezbûr Ahmed Çelebi ber-nehc-i mu‘teber-i mer‘î ba‘de’t-tahlîfi’ş-şer‘î mûcebiyle meblağ-ı mezbûr yüz guruşu tereke-i müteveffâ-yı mezbûrdan müdde‘î-i mezbûr Ahmed Çelebi’ye edâ ve teslîme mezbûrât Fâtıma ve Emine ve diğer Âişe’ye bi’l-asâle ve bi’l-vesaye tenbîh birle mâ-hüve’l-vâkı‘ bi’l-ibtigā ketb olundu. Fi’l-yevmi’s-sânî aşer min-Şa‘bâni’l-mu‘azzam sene 1137. Şuhûdü’l-hâl: İbrahim b. Muharrem, Halil b. Mustafa, Mustafa b. Ahmed, Ali b. Ahmed, Mehmed b. Ahmed, İbrahim b. Mustafa.