Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 159 Hüküm no: 133 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Taşcızade eş-Şeyh Mustafa Efendi b. Hızır’ın vârislerinin hisselerini kendi rızalarıyla taksim ettikleri Husûs-ı âti’l-beyânın mahallinde keşf ü taksîmi iltimâs olunmağın savb-ı şer‘-i enverden mevlânâ Ahmed Efendi b. eş-Şeyh Süleyman irsâl olunup ol dahi hâssa mi‘mârlardan Üstâd Şa‘ban Halife b. Mahmud ve Mehmed Halife b. İsmail ile mahrûse-i Galata’da el-Hâc A‘mâ mahallesinde sâkin iken bundan akdem vefât eden Taşcızâde eş-Şeyh Mustafa Efendi b. Hızır’ın sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf-i nebevî eyledikde müteveffâ-yı mezbûrun kebîr oğlu işbu râfi‘u’l-kitâb Molla Abdurrahim meclis-i ma‘kūd-ı mezbûrda li-ebin er karındaşları Feyzullah ve Ali nâm sagīrlerin anaları ve tesviye-i umûrlarını rü’yete kıbel-i şer‘den mansûbe vasîleri Emine bt. Hasan ve Kara Meryem bt. Abdullah nâm hâtunlar mahzarlarında ikrâr ve takrîr-i kelâm edip babam müteveffâ-yı mezbûr Taşcızâde eş-Şeyh Mustafa Efendi’den ve ba‘dehû müte‘âkiben vefât eden kız karındaşlarımız Halime ve Ümmühâni ve Âişe ile anamız Rukiye’nin terekelerinden olan mahalle-i mezbûrede vâki‘ iki tarafdan cidâr-ı hısn ve bir tarafdan ba‘zen Ahmed Kapudan ve ba‘zen İsmail Çelebi menzilleri ve bir tarafdan ba‘zen Abdullah ve ba‘zen es-Seyyid Hüseyin ve ba‘zen Mehmed Reis menzilleri ve tarîk-i hâs ile mahdûd müştemilât-ı ma‘lûmeyi hâvî olup mi‘mârân-ı mezbûrân mesâha ve takvîmleriyle doksan üç bin sekiz yüz elli akçeye mukavvim olunan mülk menzilin sekiz sehimden üç sehimi irsen ve şirâen ve hibeten bana ve bir sehmi karındaşım el-Hâc Mehmed Efendi’ye ve ikişer sehimden dört sehmi sagīrân-ı mezbûrân Feyzullah ve Ali’den her birine isâbet edip ve menzil-i mezbûr her vechile vâsi‘ ve kabîl-i taksîm olmağla bi’r-rızâ taksîme tâlib olduğumuzda menzil-i merkūmdan olup iki tarafdan cidâr-ı hısn ve bir tarafdan benim hisseme ta‘yîn ve tahsîs olunan mahal ve bir tarafdan ba‘zen yine benim hisseme ta‘yîn olunan mahal ve ba‘zen tarîk-i hâs ile mahdûd mi‘mârân-ı mezbûrân mesâha ve takvîmleriyle cem‘an yirmi üç bin dört yüz altmış dört akçeye tahmîn olunan tûlen ve arzan bi-hesâb-ı terbî‘i yirmi üç zirâ‘ arsa ve kal‘a dîvârı üzerlerinde mebnî fevkānî iki bâb oda ve tahtında bir bi’r-i mâ ve bir harâb hamâm ve kule derûnunda mebnî biri biri üzerinde üç bâb harâb oda ve bir mikdâr arsa-i hâliye ve sokak kapısı beynlerinde müşterek olmak üzere iki sehm hisse-i irsiyyesi mukābelesinde sagīr-i mezbûr Ali’ye ta‘yîn ve tahsîs olunup ve bir tarafdan cidâr-ı hısn ve bir tarafdan Ahmed Kapudan menzili ve bir tarafdan mezbûrân el-Hâc Mehmed Efendi ve sagīr Feyzullah hisselerine ta‘yîn olunan mahall ve bir tarafdan ba‘zen sagīr-i mezbûr Ali hissesine ta‘yîn olunan mahal ve tarîk-i hâs ile mahdûd kezâlik mi‘mârân-ı mezbûrân mesâha ve takvîmleriyle cem‘an otuz beş bin yüz doksan altı akçeye tahmîn olunan tûlen ve arzan bi-hesâb-ı terbî‘i yüz yedi zirâ‘ arsa ve bir mikdâr kal‘a duvarı üzerinde mebnî ulyâda bir bâb oda vüstâda bir bâb oda ve tahtında kenîf ve bir mikdâr arsa-i hâliye ve müşterek sokak kapısını müştemil olan mahall üç sehm hisse-i irsiyyem mukābelesinde bana ta‘yîn ve tahsîs olunup ve bir tarafdan ba‘zen benim hisseme ve ba‘zen sagīr-i mezbûr Ali hissesine ta‘yîn olunan mahal ve bir tarafdan İsmail Çelebi ve bir tarafdan ba‘zen Abdullah ve ba‘zen es-Seyyid Hüseyin ve ba‘zen Mehmed Reis menzilleri ve bir tarafdan tarîk-i hâs ile mahdûd kezâlik mi‘mârân-ı mezbûrân mesâha ve takvîmleriyle cem‘an otuz beş bin yüz doksan altı akçeye tahmîn olunan tûlen ve arzan bi-hesâb-ı terbî‘i yüz on dört arsa üzerinde mebnî ulyâda bir bâb oda vüstâda bir bâb oda ve tahtında bir harâb bi’r-i mâ ve kenîf ve bir mikdâr arsa-i hâliye ve müşterek sokak kapısını müştemil olunan mahall-i mezbûrân el-Hâc Mehmed Efendi ve sagīr Feyzullah hisselerine ta‘yîn ve tahsîs ve ifrâz ve beynlerine alâmet-i fâsıla vaz‘ ve her birimiz hisse-i müfreze-i merkūmemizi bi’r-rızâ ahz u kabz eyledik dediklerinde gıbbe’t-tasdîki’ş-şer‘î vaki‘-i hâli mevlânâ-yı mezkûr mahallinde ketb ü tahrîr ve ma‘an ba‘s olunan Çukadâr Hüseyin Bey b. Abdullah ve Muhzır Ali b. Ahmed ile meclis-i şer‘a gelip alâ vukū‘ihî inhâ ve takrîr etmeğin mâ-vaka‘a bi’l-ibtigā ketb olundu. Fi’l-yevmi’s-sânî min-Şa‘bâni’l-mu‘azzam sene 1137. Şuhûdü’l-hâl: Şeyhi Mehmed Çelebi b. el-Hâc İsmail, el-Hâc Mehmed b. el-Hâc Osman, İshak Kapudan b. Yahya, Osman Çelebi b. İbrahim, Abdullah Beşe Mehmed, Hasan Çavuş b. Mehmed, İbrahim Çelebi b. Mustafa, Mustafa b. Ahmed.