Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 160 Hüküm no: 134 Orijinal metin no: [19a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sandıkçı taifesinin kethüdası olan İbrahim Beşe kendi rızasıyla ayrıldığından yerine el-Hâc Hasan b. Fazlı’nın kethüda tayin edildiği Mahrûse-i Galata’da vâki‘ sandıkcı tâifesinin müsin ve ihtiyâr ustalarından Ömer Beşe b. Hüseyin ve İbahim Beşe b. Ahmed ve diğer Ömer Beşe b. Osman ve Mustafa Beşe b. Ahmed ve diğer Ömer Beşe b. Mehmed ve diğer Ömer Beşe b. Murteza nâm kimesneler vesâirleri meclis-i şer‘de yine tâife-i merkūme ustalarından işbu râfi‘u’l-vesîka el-Hâc Hasan b. Fazlı mahzarında her biri ikrâr ve takrîr-i kelâm edip kethudâmız olan İbrahim Beşe tâife-i merkūmenin umûrunu rü’yetde âciz olduğundan nâşî kendi rızâsıyla kethudâlıkdan kasr-ı yed etmeğin mukaddemâ kethudâmız olup beynimizde istikāmet ve diyânet birle mevsûf olan mezbûr el-Hâc Hasan yedinde olan mi‘mâr ağa tezkiresi mûcebince tâife-i merkūme üzerlerine kıbel-i şerî‘at-ı garrâdan kethudâ nasb ve ta‘yîn olunması murâdımızdır dediklerinde hâkim-i muvakkı‘-ı a‘le’l-kitâb tûbâ-lehû ve hüsnü-meâb efendi hazretleri dahi eşhâs-ı mezbûrenin taleb ve iltimâsıyla mezbûr el-Hâc Hasan tâife-i merkūme üzerlerine kethudâ nasb ve ta‘yîn eyledikde ol dahi ber-vech-i muharrer kethudâlığı kabûl ve hıdemât-ı lâzimesini mahallinde ikāmete ta‘ahhüd etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis ve’l-ışrîn min-Şa‘bâni’l-mu‘azzam sene 1137. Şuhûdü’l-hâl: Hızır b. Mustafa, Mustafa b. Ahmed, İbrahim b. Mustafa, Mustafa b. Ahmed, Mehmed b. Ahmed.