Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 161 Hüküm no: 135 Orijinal metin no: [19b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anton v. Yani’nin Nikola’ya olan borcunu ödemediği için evinin vekili tarafından müzâyede ile Aleksi’ye satıldığı (istiğlâl) Mahrûse-i Galata’da Sultan Bayezid mahallesinde sâkin Tanaş v. Lefter nâm zimmî mahfil-i şer‘de işbu hâmilü’r-rakīm Aleksi v. Dimitri nâm zimmî muvâcehesinde ikrâr ve takrîr-i kelâm edip mahalle-i merkūme sâkinlerinden gāib ani’l-beled Anton v. Yani v. Anton nâm zimmî mahalle-i merkūmede vâki‘ bir tarafdan el-Hâc Hüseyin mülkü ve bir tarafdan Berber Şa‘ban mülkü ve bir tarafdan Papa mülkü ve bir tarafdan tarîk-i âm ile mahdûd ulyâda iki bâb oda ve bir sofa vüstâda iki bâb oda ve bir sofa ve matbah ve kenîf ve tahtında bir kenîf ve eşcâr-ı müsmire ve gayr-i müsmireli bahçeyi müştemil mülk menzilini bâ hüccet-i şer‘iyye bin yüz otuz senesi Receb-i şerîfinin yirminci günü işbu hâzır bi’l-meclis Nikola v. Yahşi nâm zimmîye bi-tarîki’l-istiğlâl bin guruş semen-i makbûza bey‘ u teslîm ol dahi iştirâ ve tesellüm ve kabûl eyledikden sonra gāib-i merkūm Anton menzil-i mahdûd-ı merkūmu ba‘de’t-tahliyeti’ş-şer‘iyye ve’t-tekābuz senede ellişer guruşa olmak üzere târih-i mezbûrdan üç sene tamâmına değin akd-i vâhid ile cem‘an yüz elli guruşa merkūm Nikola’dan istîcâr ve tesellüm eyleyip ve müddet-i mezbûre tamâmına dek meblağ-ı mezbûr bin guruş ile menzil-i merkūmum lâzım gelen mikdâr-ı mezkûr ücretini merkūm Nikola’ya edâ ve teslîm edemezse menzil-i mahdûd-ı merkūmu semen-i misli ile âhara bey‘ ve semenini ahz u kabz ve semen-i mezbûrdan deyn-i merkūmu mersûm Nikola’ya edâ ve teslîm ve fazla kalırsa fazlasını kendüye îsâle vekâlet-i devriye-i şer‘iyye ile beni tarafından vekîl eylediklerinden sonra müddet-i merkūme hulûl edip deyn-i merkūmu mersûm Nikola’ya edâ edemediği ecilden merkūm Nikola dahi yedimde olan isbât hücceti mantûkunca gāib-i merkūm Anton ber-vech-i muharrer müddet-i madrûbe hulûlünde deyn-i mezbûru edâ edemediği takdîrce menzil-i mahdûd-ı merkūmu âhara bey‘ ve semen[ini] ahz u kabz ve deyn-i mezbûru edâya tarafından beni vekîl eylediğini târih-i kitâbdan yirmi bir ay mukaddem işbu bâb mahkemesinde hilâfeten müvellâ olan Ahmed Efendi huzûrunda benden ba‘de’d-da‘vâ ve’l-inkâr ve’l-isbât vech-i meşrûh üzere vekâletime hüküm ve menzil-i merkūmu âhara bey‘ ve edâ-i deyne kıbel-i şer‘den bana tenbîh olunmuş idi binâen alâ-zâlik vekâletime hüküm ve menzil-i merkūmu izn-i şer‘le bey‘a arz ve târih-i kitâba gelince münâdî yediyle yirmi ay mikdârı mütevâliyeten mecma‘-ı nâs olan mahallerde nidâ ve müzâyede etdirdiğimde menzil-i merkūm-ı mersûm Aleksi üzerinde yedi yüz elli guruşda karâr edip ve ragabât-ı nâs bi’l-külliye munkatı‘a olup ve ziyâde ile tâlib-i âhar olmayıp ve meblağ-ı mezbûr el-yevm menzil-i mahdûd-ı merkūmun semen-i mislinden ezyed ve evfer olduğu zeyl-i vesîkada isimleri muharrer olan bî-garaz ehl-i vukūf sikāt-ı muvahhidîn ihbârlarıyla lede’ş-şer‘ zâhir olmağın ben dahi vekâlet-i mahkiyem hasebiyle menzil-i mahdûd-ı merkūmu bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm Aleksi’ye yedi yüz elli guruşa bey‘ u teslîm eylediğimde ol dahi ber minvâl-i muharrer iştirâ ve tesellüm ve kabz ve kabûl eyledikden sonra semeni olan meblağ-ı merkūmu müşterî-i mersûm Aleksi yedinden bi’l-vekâle tamâmen alıp kabz eyledim ba‘de’l-yevm menzil-i mahdûd-ı merkūm bi-cümletin mâ yeştemilühû ve yahvîhi müşterî-i mersûm Aleksi’nin mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin ve’l-ışrîn min-Şa‘bâni’l-mu‘azzam sene 1137. Şuhûdü’l-hâl: el-Hâc Hasan b. el-Hâc Veli, el-Hâc İbrahim b. el-Hâc Halil, Arûsi Mustafa Efendi b. Hasan, Ahmed Efendi b. eş-Şeyh Süleyman, Yahya Efendi b. Yusuf Efendi, Ahmed Çelebi b. Ali, Mehmed Ağa b. Abdullah.