Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 162 Hüküm no: 136 Orijinal metin no: [19b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Midilli’de Telvine köyü kethüdası Dimitraki v. Manol’un kendi rızasıyla kethüdalıktan ayrıldığı Bahr-i Sefîd’de vâki‘ Midilli cezîresinde Molova kazâsına tâbi‘ Telvine nâm karye sâkinlerinden Dimitraki v. Manol nâm zimmî meclis-i şer‘de yine karye-i mezbûre ahâlîsinden Yanaki v. İstamat ve Angeli v. Manol ve Yorgi v. Dimitri ve Yanaki v. Dimitri ve Yorgi v. Yani ve Yani v. Yanaki ve Manol v. Palolo ve Kostantin v. Niki ve Kostanti v. Derme ve Niki v. Manol nâm zimmîler muvâcehelerinde ikrâr ve takrîr-i kelâm edip bundan akdem karye-i mezbûre ahâlîsi beni kethudâ ve karye-i merkūmeye lâzım gelen tekâlîf-i örfiyyelerini cem‘ u tahsîl ve mahalline teslîme taraflarından vekîl etmeleriyle ben dahi ahâlî-i karye taraflarından köy kethudâsı vekîlleri olmağla târih-i kitâba gelince karye-i mezbûrenin iktizâ eden mesâlihini bir sene tamâmen rü’yet etmiş idim hâlâ eşhâs-ı merkūme ile beynimizde hesâb ve kitâb gördüğümüzden sonra zikr olunan kethudâlık hizmetinden kendi rızâm ile fâriğ olup ve târih-i kitâba gelince ahâlî-i karye-i mezbûrenin tekâlîfleri olan masârıfıma müte‘allika da‘vâdan eşhâs-ı mezbûrenin zimmetlerini ibrâ ve ıskāt eyledim dedikde gıbbe’t-tasdîki’ş-şer‘î mâ-vaka‘a bi’l-ibtigā ketb olundu. Fi’l-yevmi’t-tâsi‘ ve’l-ışrîn min-Şa‘bâni’l-mu‘azzam sene 1137. Şuhûdü’l-hâl: Halil Ağa b. Halil, Muhzır Ali Bey, Ali b. Ahmed, Bursalı Mehmed, İbrahim b. Mustafa, Ali Beşe b. Abdi Erselî?, Baba Yusuf b. Abdullah.