Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 163 Hüküm no: 137 Orijinal metin no: [19b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Helvacı Yusuf b. Abdullah’ın helvacı dükkanındaki eşyalarının vârisleri tarafından Abdullah Çelebi b. Mehmed’e satıldığı Mahrûse-i Galata’da Câmi‘-i Kebîr mahallesinde sâkin iken bundan akdem vefât eden Helvacı Yusuf b. Abdullah nâm kimesnenin verâseti zevce-i metrûkesi Fâtıma bt. Abdullah nâm hâtuna ve usûbet-i nesebiyye cihetinden Ali b. Mehmed nâm kimesneye münhasıra olduğu zâhir ve mukarrer oldukdan sonra mezbûrân Ali ve Fâtıma meclis-i şer‘-i hatîr-i lâzimü’t-tevkīrde helvacı işbu râfi‘u’l-kitâb Abdullah Çelebi b. Mehmed mahzarında her biri ikrâr ve takrîr-i kelâm edip müteveffâ-yı muzbûrun Arab Çarşısı’nda vâki‘ hâlâ mezbûr Abdullah Çelebi’nin taht-ı icâresinde olan helvacı dükkânı derûnunda beynimizde ma‘lûm mermer ve terâzi ve dirhem ve tabla vesâir eşyâ-yı mezbûr Abdullah Çelebi’ye tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile altmış guruşa bey‘ ve tesellüm ve kabûl eyledikden sonra semeni olan meblağ-ı mezbûr altmış guruşu mezbûr Abdullah yedinden tamâmen ahz u kabz eylediğimden sonra dükkân-ı mezbûra müte‘allika âmme-i da‘âvî ve mutâlebât ve eymân ve muhâsamâtdan her birimiz âharın zimmetini ibrâ ve ıskāt eylediğimizde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sânî min-şehr-i Ramazâni’l-mübârek sene 1137. Şuhûdü’l-hâl: Usta Ali Kethüda, Mütevellî Ali Beşe, Yazıcı Mehmed Çelebi, Arabkapılı Usta Ahmed, Kazıklıoğlu Ali Beşe, Helvacı el-Hâc İbrahim, Halil Çelebi b. Mustafa.