Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 163 Hüküm no: 138 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgaki’nin dört hisseden ikisine sahip olduğu mülk menzilinin, borcu için babası Zuhur v. Yorgi tarafından satılarak borcunun ödendiği Mahrûse-i Galata muzâfâtından İstinye nâhiyesine tâbi‘ Tarabya nâm karye ahâlîsinden olup hâlâ Eflak diyârında olan Yorgaki nâm medyûnun babası ve tarafından ber-vech-i âtî vekâlet iddi‘â eden Zuhur v. Yorgi nâm zimmî meclis-i şer‘de sarrâf tâifesinden işbu sâhibü’r-rakīm Parnik v. Murat nâm Ermeni muvâcehesinde üzerine da‘vâ ve takrîr-i kelâm edip oğlum müvekkile-i merkūm Yorgaki’nin merkūm Parnik Ermeni’ye cihet-i karz-ı şer‘îden dört yüz guruş deyni olmağın oğlum merkūm Yorgaki târih-i kitâbdan on dört ay mukaddem Eflak diyârına azîmeti esnâsında karye-i mezbûrede vâki‘ bir tarafdan Kürkcübaşı Tanaş mülkü ve bir tarafdan leb-i deryâ ve bir tarafdan tarîk-i âm ile mahdûd fevkānî iki bâb oda ve bir sofa ve dehlîz ve tahtânî bir mahzen ve kenîf ve bi’r-i mâyı müştemil mülk menzilde olan nısf hisse-i şâyi‘asını âhara bey‘ ve kabz-ı semene ve semen-i mezbûr ile deyn-i mezkûrunu edâya vekâlet-i mutlaka ile beni tarafından vekîl ve nâib-i menâb nasb ve ta‘yîn edip ben dahi ber-vech-i muharrer vekâlet-i mezbûreyi kabûl eylemiş idim binâen alâ-zâlik oğlum gāib-i merkūmun menzil-i mahdûd-ı mezbûrda olan nısf hisse-i şâyi‘asını merkūm Sarraf Parnik’e iki yüz guruşa vekâlet-i mahkiyem hasebiyle bey‘ u teslîm edip ol dahi ber-vech-i muharrer iştirâ ve kabûl eyledikden sonra semen-i mezbûr iki yüz guruşu deyn-i mezkûruna takās eylediğimde ol dahi vech-i muharrer mukāssa ve kabûl etmeğle menzil-i mezbûru merkūm Parnik tarafına teslîm murâd eylediğimde kabzdan imtinâ‘ eder suâl olunup kabzına tenbîh olunmak matlûbumdur dedikde gıbbe’s-suâl merkūm Parnik cevâbında fi’l-vâki‘hâl müdde‘î-i merkūm Zuhur’un bi’l-cümle bâlâda takrîr ve tafsîl eylediği minvâl üzere olduğunu ikrâr lâkin müdde‘î-i mezbûrun oğlu gāib-i merkūm tarafından ber-vech-i muharrer vekâletini inkâr edicek müdde‘î-i merkūmdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden mahmiye-i İstanbul’da Cibalikapısı dâhilinde Mustafa Paşa mahallesinde sâkin Halil Çelebi b. Ahmed ve Büyükdere nâm karyede sâkin Ahmed Çelebi b. Mustafa nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müdde‘î-i merkūm Zuhur’un sulbî kebîr oğlu gāib-i merkūm Yorgaki v. Zuhur v. Yorgi on dört ay mukaddem Eflak diyârına azîmeti esnâsında bâlâda hudûd ve müştemilâtı zikr u beyân ve şerh ü ayân olunan menzilde olan nısf hisse-i şâyi‘a-i mezkûresini semen-i misli ile âhara bey‘ u kabz-ı semene ve semen-i mezbûr ile işbu merkūm Parnik sarrafa olan deynini edâya tarafından babası işbu merkūm Zuhur’ı vekâlet-i mutlaka ile bizim huzûrumuzda vekîl ve nâib-i menâb nasb ve ta‘yîn eyledikde ol dahi ber-vech-i muharrer vekâlet-i mezbûreyi kabûl ve hıdemât-ı lâzimesini edâya ta‘ahhüd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm ve’l-beyyine merkūm Parnik meclis-i mezbûrda vekîl-i merkūm Zuhur muvâcehesinde ikrâr ve takrîr-i kelâm edip ânifen kabzına tenbîh-i şer‘î lâhik olan nısf hisse-i mezkûreyi vekîl-i merkūm Zuhur bana teslîm etmeğin ben dahi yedinden kabz ve tesellüm eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâbi‘ ve’l-ışrîn min-Şa‘bâni’l-mu‘azzam sene 1137. Şuhûdü’l-hâl: Mehmed Çavuş b. Ali, Seyyid Ahmed Çavuş b. Ahmed, Halil Çelebi b. Mustafa, Mustafa b. Ahmed, Tanaş v. Lefter, Agop v. Yasef, Anaştaş v. Nikola, Yamandi v. Andon, Levizo v. Dimitri.