Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 164 Hüküm no: 139 Orijinal metin no: [20a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Mustafa ile Fatıma bt. Abdullah’ın müşterek menzillerini es-Seyyid Hüseyin Efendi’ye sattıkları Mahrûse-i Galata muzâfâtından kasaba-i Kasımpaşa’da Piyalepaşa-yı Kebîr mahallesinde vâki‘ üç tarafdan es-Seyyid Hüseyin Efendi mülkü ve bir tarafdan tarîk-i âm ile mahdûd tahtânî iki bâb oda ve dehlîz ve kenîf ve sokak kapısını müştemil mülk menzilin nısfı Emine bt. Mustafa ve nısf-ı âharı Fâtıma bt. Abdullah nâm hâtunların iştirâken mülkleri olduğu zâhir ve mukarrer oldukdan sonra mezbûre Fâtıma Hâtun zâtı ba‘de’t-ta‘rîfi’ş-şer‘î asâleten ve mezbûre Emine Hâtun’un zevci ve tarafından ikrâr-ı âti’z-zikre vekîl olduğu mezbûrenin zâtını ma‘rifet-i şer‘iyye ile ârifân es-Seyyid Yusuf Çelebi b. Mustafa ve Ali Beşe b. Halil nâm kimesneler şehâdetleriyle sâbit olan Mehmed b. Abdullah nâm kimesne vekâleten meclis-i şer‘de işbu sâhibü’l-kitâb es-Seyyid Hüseyin Efendi b. es-Seyyid Mustafa mahzarında her biri bi’l-asâle ve bi’l-vekâle ikrâr ve takrîr-i kelâm edip hâlâ silk-i mülkümüzde münselik olup bâlâda zikr u beyân ve ve tahrîr ve ayân olunan menzil-i mahdûd-ı mezkûru bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile yetmiş guruşa bey‘ u teslîm edip ol dahi ber-vech-i muharrer iştirâ ve tesellüm ve kabz ve kabûl eyledikden sonra semeni olan meblağ-ı mezbûr yetmiş guruşu bi-kadri hisesinâ yedinden bi’t-tamâm ahz u kabz eyledik ba‘de’l-yevm menzil-i mahdûd-ı mezkûr bi-cemî‘i mâ yeştemilühû ve yahvîhi mezbûr es-Seyyid Hüseyin Efendi’nin mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fî-gurre-i Ramazâni’l-mübârek sene 1137. Şuhûdü’l-hâl: el-Hâc Abbas Efendi b. İbrahim, Müezzin Mustafa Çelebi, Mütevellî Mahmud Ağa, Topkapılı İbrahim Efendi, es-Seyyid Abdullah Çelebi b. es-Seyyid Mustafa, es-Seyyid Yusuf Çelebi b. Mustafa, Ali Beşe b. Halil.