Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 165 Hüküm no: 140 Orijinal metin no: [20a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. İğneci Mehmed’in boş arsasını Hasan Çelebi’ye sattığı Mahrûse-i Galata muzâfâtından kasaba-i Kasımpaşa’da el-Hâc Hüsrev mahallesinde sâkine Rukiye bt. İğneci Mehmed b. Abdullah nâm hâtun tarafından bey‘-i âti’z-zikri ikrâra vekîli olduğu zât-ı mezbûreyi ma‘rifet-i şer‘iyye ile ârifân Murad Ağa b. İvaz ve Ali Beşe b. Mustafa nâm kimesneler şehâdetleriyle şer‘an ve vekâletine hükm-i şer‘î lâhik olan Ahmed Kapudan b. Mustafa nâm kimesne meclis-i şer‘-i hatîr-i lâzimü’t-tevkīrde işbu râfi‘u’l-kitâb Hasan Çelebi b. Abddurrahîm nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Rukiye Hâtun akd-i âti’z-zikrin sudûruna değin silk-i mülkümde münselik olup mahalle-i mezbûrede vâki‘ üç tarafdan müşterî-i mezbûr Hasan Çelebi mülkü ve bir tarafdan müvekkilem mezbûre Rukiye Hâtun’un âhar mülkü ile mahdûd tahmînen bi-hesâb-ı tebrî‘î yüz on iki zirâ‘ arsa-i hâliyesini tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Hasan Çelebi’ye sekiz guruşa bey‘ u temlîk ve teslîm eyledikde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr sekiz guruşu mezbûr Hasan Çelebi yedinden tamâmen ahz u kabz eyledi ba‘de’l-yevm arsa-i mahdûde-i mezkûre mezbûr Hasan Çelebi’nin mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fî-gurre-i Ramazâni’l-mübârek sene 1137, Şuhûdü’l-hâl: Molla Hasan b. el-Hâc Mehmed, İbrahim b. Muharrem, Halil Çelebi b. Mustafa, İbrahim b. Mustafa, Mustafa Çelebi b. Ahmed, Mehmed Çelebi b. Ahmed, Ali Çelebi b. Ahmed.