Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 166 Hüküm no: 141 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Hasan’ın, gemisi batan Hüseyin Reis’de olan alacağının yarısından vazgeçtiği Vilâyet-i Rumeli’nde Balçık kasabasında Kara Mahmud mahallesi ahâlîsinden Molla Hasan b. el-Hâc Ali nâm kimesne meclis-i şer‘de mahrûse-i Galata hâricinde Bedreddin Bey mahallesinde sâkin sefîne reîslerinden işbu râfi‘u’l-kitâb Hüseyin Reis b. Ali nâm kimesne mahzarında ikrâr ve takrîr-i kelâm edip mezbûr Hüseyin Reis’e târih-i kitâbdan beş ay mukaddem mârrü’z-zikr Balçık kasabasında mâlımdan yüz guruş ikrâz ve teslîm eylediğimde ol dahi ber-vech-i muharrer yedimden ba‘de’l-ahz meblağ-ı mezbûr ile eşyâ-i mütenevvi‘a-i ma‘lûme iştirâ ve sefînesine tahmîl ve İstanbul’a gelirken esnâ-yı tarîkde Marina? nâm mahalde bi-emri’llâhi te‘âlâ sefînesi karaya düşüb hâlik olmağın mezbûr Hüseyin Reis’in hâline merhameten meblağ-ı mezbûr yüz guruşun elli guruşunu yedinden ahz u kabz edip mâ‘adâsı olan elli guruşa müte‘allika âmme-i da‘âvî ve mutâlebât ve eymân ve muhâsamâtdan mezbûr Hüseyin Reis’in zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâbi‘ min-şehri Ramazâni’l-mübârek sene 1137. Şuhûdü’l-hâl: el-Hâc Ahmed b. Mustafa, el-Hâc Hüseyin b. İsmail, Abdullah Çelebi b. el-Hâc Mehmed, el-Hâc Mehmed b. Veli, Mustafa Çelebi b. Abdullah, Abdullah Reis Kavaklı, Halil Çelebi b. Mustafa, İbrahim b. Mustafa.