Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 170 Hüküm no: 148 Orijinal metin no: [21a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa b. Yahya’nın menzilini Yusuf Ağa b. Abdullah’a sattığı Mahrûse-i Galata hâricinde Bedreddin Bey mahallesinde sâkin Ali Ağa b. Yahya nâm kimesne meclis-i şer‘de işbu râfi‘u’l-kitâb Yusuf b. Abdullah nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup mahalle-i mezbûrede vâki‘ bir tarafdan Emine ve Ferah nâm hâtunlar menzilleri ve bir tarafdan el-Hâc Süleyman veresesi menzilleri ve bir tarafdan Takyeci Halil mülkü ve bir tarafdan tarîk-i âm ile mahdûd fevkānî iki bâb oda ve bir sofa ve tahtânî bir bâb harâb oda ve bir bi’r-i mâ ve kenîf ve bir mikdâr havlu ve sokak kapısını müştemil mülk menzilimi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Yusuf’a iki yüz guruşa bey‘ u temlîk ve teslîm eylediğimde ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr iki yüz guruşu mezbûr Yusuf yedinden tamâmen ahz u kabz eyledim ba‘de’l-yevm menzil-i mahdûd-ı mezbûr bi-cemî‘i mâ yeştemilühû ve yahvîhi mezbûr Yusuf’un mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-âşir min-şehri Ramazâni’l-mübârek sene 1137. Şuhûdü’l-hâl: İmâm es-Seyyid Ahmed Efendi b. İbrahim, Ahmed Çelebi b. Ali, Ali Beşe b. Şa‘ban, İbrahim b. Muharrem, Molla Mehmed b. Yusuf, Ali b. Ahmed.