Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 170 Hüküm no: 149 Orijinal metin no: [21a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agorse bt. Todori v. Nikola’nın hissesi olan dükkanlarının alım satımına Dimitri v. Polonizo’yu naib tayin ettiği Mahrûse-i Galata muzâfâtından kasaba-i Kasımpaşa’da Tatavla nâm karyede sâkine Agorse bt. Todori v. Nikola nâm Nasrâniyenin karındaşı ve tarafından ikrâr-ı âti’z-zikre vekîl olduğu merkūmenin şahsını ma‘rifet-i şer‘iyye ile ârifân Papa Yorgi v. Yani ve Yani v. Papa Yorgi nâm zimmîler şehâdetleriyle şer‘an sâbit olan Nikola v. Todori nâm zimmî meclis-i şer‘de müvekkile-i merkūmenin hâlâ zevci işbu râfi‘u’r-rakīm Dimitri v. Polonizo nâm zimmî muvâcehesinde ikrâr ve takrîr-i kelâm edip kız karındaşım müvekkile-i merkūme Agorse kasaba-i Kasımpaşa’da ve mahmiye-i İstanbul’da Balıkpazarı kapısı hâricinde Tahtakale kurbünde vesâir mahallerde vâki‘ bakkal dükkânlarının sermâyelerinde olan hisse-i ma‘lûmelerini şerîkleri olan zimmîlerden ahz u kabza ve kendüye îsâle ve şerîkleri ile hesâblarını görmeğe zevci merkūm Dimitri’yi tarafından vekîl ve nâib-i menâb nasb ve ta‘yîn eyledikde ol dahi ber-vech-i muharrer vekâlet-i mezbûreyi kabûl ve mahallinde hıdemât-ı lâzimesini ikāmete ta‘ahhüd eyledi dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis aşer min-şehri Ramazâni’l-mübârek sene 1137. Şuhûdü’l-hâl: İbrahim b. Muharrem, Halil b. Mustafa, İbrahim b. Mustafa, Mustafa b. Ahmed, Mehmed b. Ahmed, Ali b. Abdullah.