Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 171 Hüküm no: 150 Orijinal metin no: [21a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ramazan Beşe b. İbrahim’in menzil, tarla ve ormanda olan dört sehm hisseden bir sehmini Hüseyin b. Osman ile İbrahim b. Osman’a sattığı Fi’l-asl vilâyet-i Anadolu’da Karahisar-ı Şarki sancağında Ya‘kub Bey Derbendi kazâsına tâbi‘ Kızılhisar nâm karye ahâlîsinden olup hâlâ mahrûse-i Galata’da Bereketzâde mahallesinde mutavattın Ramazan Beşe b. İbrahim b. Muslihiddin nâm kimesnenin sulbî kebîr oğlu ve tarafından ikrâr-ı âti’z-zikre vekîl olduğu Mehmed Beşe b. Ali ve diğer Mehmed b. Mustafa nâm kimesneler şehâdetleriyle sâbit olan Ahmed Beşe nâm kimesne meclis-i şer‘de yine karye-i mezbûre sükkânından olup husûs-ı âti’z-zikre kendi tarafından asîl ve karındaşı İbrahim b. Osman b. Muslihiddin tarafından sâbitü’l-vekâle vekîli olan işbu sâhibü’l-kitâb Hüseyin b. Osman nâm kimesne mahzarında bi’l-vekâle ikrâr ve takrîr-i kelâm edip babam müvekkil-i mezbûr Ramazan Beşe babası müteveffâ-yı mezbûr İbrahim’den muntakıll olup karye-i mezbûrede vâki‘ mülk menzil ve bahçeden mâ‘adâ mevâzı‘-ı adîdede vâki‘ tarlalarda ve orman ve kesenekde olan dört sehimden bir sehm hisse-i şâyi‘asını ma‘rifet-i sâhib-i arz ile mezbûrân Hüseyin ve İbrahim’e on beş guruş bedel mukābelesinde ferâğ ve tefvîz ve mahallinde kabz ve tasarrufa taslît eyledikde mezbûr Hüseyin dahi bi’l-asâle ve bi’l-vekâle tefevvüz ve kabûl eyledikden sonra bedel-i mezbûr on beş guruşu mezbûr Hüseyin yedinden tamâmen ahz u kabz eyledi ba‘de’l-yevm babam müvekkil-i mezbûrun karye-i mezbûrede vâki‘ tarlalarda ve kesenekde olan dört sehimden bir sehm hisse-i şâyi‘ası mezbûrân Hüseyin ve İbrahim’in dâhil-i havza-i tasarrufları olmuşdur keyfe mâ yeşâ ve yahtâr mutasarrıf olsunlar dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis aşer min-şehri Ramazâni’l-mübârek sene 1137. Şuhûdü’l-hâl: İbrahim Efendi b. Yusuf müftü, eş-Şeyh Süleyman Efendi b. Mustafa, Hatib Mustafa Efendi, Ali Efendi [b.] Ahmed müezzin-i Süleymaniye, el-Hâc İbrahim b. Abdullah, Musa b. Mehmed, Ali b. Osman, Mehmed b. Ahmed, Halil b. Mustafa.