Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 172 Hüküm no: 151 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayana bt. Bedros’un eşyalarını Asvador v. Malkon’a sattığı Husûs-ı âti’z-zikrin mahallinde ketb ü tahrîri iltimâs olunmağın savb-ı şer‘i’l-enverden mevlânâ Halil Efendi b. Hüseyin me’zûnen irsâl olunup ol dahi Asvador v. Malkon nâm Ermeninin mahrûse-i Galata’da Sultan Bayezid mahallesinde vâki‘ sâkin olduğu menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf-i nebevî eyledikde merkūm Asvador’un kız karındaşı kızı olup şahsı Kapıcı Ali Beşe b. Ahmed ve Mustafa Beşe b. Mahmud ta‘rîfleriyle mu‘arrefe olan Kayana bt. Bedros v. Mardiros nâm Ermeniye meclis-i ma‘kūd-ı mezbûrda işbu hâmilü’r-rakīm merkūm Asvador muvâcehesinde ikrâr ve takrîr-i kelâm edip eşyâ-i memlûkeden işbu mu‘âyene ve müşâhede olan üçer ayaklı bir çift zümrüd küpe üç bin akçeye ve on miskal bir çift altun bilezik dört bin akçeye ve bir incili serpûş üç bin akçeye ve bir sagīr inci ön kuşak sekiz yüz akçe ve bir sîm sagīr kuşak üç yüz akçe ve müsta‘mel mor telli bir hatâyî kavuşdurma ma‘a anteri bin sekiz yüz akçe ve siyah hâre kavuşdurma ma‘a anteri bin sekiz yüz akçe ve inci şemseli bir yeşil hâre cübbe bin beş yüz akçe ve anber-bûyî bir hâre ferâce bin beş yüz akçe ki min haysü’l-mecmû‘ eşyâ-i merkūmemi bi-safkatin vâhidetin merkūm Asvador’a tarafeynden îcâb ve kabûlü hâvî bey‘-i bâtt-ı sahîh-i şer‘î ile on yedi bin yedi yüz akçeye bey‘ u teslîm edip ol dahi ber-vech-i muharrer iştirâ ve tesellüm ve kabûl eyledikden sonra eşyâ-i merkūmenin aynlarına ve cem‘an semenleri olan meblağ-ı mezbûr on yedi bin yedi yüz akçeye müte‘allika âmme-i de‘âvî ve eymân ve muhâsamâtdan merkūm Asvador’un zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm eşyâ-i muharrere-i merkūme merkūm Asvador’un mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î vâki‘-i hâli mevlânâ-yı mezkûr mahallinde ketb ü tahrîr ve ma‘an ba‘s olunan Serbölük Halil Çelebi b. Mustafa ve İbrahim b. Mustafa ile mahfel-i şer‘a gelip alâ-vukū‘ihî inhâ ve takrîr etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sânî aşer min-şehri Ramazâni’l-mübârek sene 1137. Şuhûdü’l-hâl: Bezzâstânî Ahmed Çelebi b. Abdullah, diğer Ahmed Çelebi b. Mehmed, Yemenici Mustafa Beşe b. Mahmud, Ali Beşe b. Ahmed, Halil Çelebi b. Mustafa, İbrahim b. Mustafa.