Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 173 Hüküm no: 154 Orijinal metin no: [21b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe b. Ali’nin menzil, bağ ve bahçeyi Hasan b. Hüseyin’e terk ettiği Vilâyet-i Anadolu’da Ayandon kazâsına tâbi‘ Yılancık nâm karye ahâlîsinden Ahmed Beşe b. Ali nâm kimesne meclis-i şer‘de yine karye-i mezbûre ahâlîsinden olup hâlâ mahrûse-i Galata muzâfâtından kasaba-i Fındıklı’da Kazgancıbaşı mahallesinde mütemekkin Hasan b. Hüseyin nâm kimesne mahzarında ikrâr ve takrîr-i kelâm edip mezbûr Hasan silk-i mülkümde münselik olup karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât mülk menzilimi ve bağ ve bahçemi bi-gayrı hakkın zabt ve tasarruf eyledin deyü benden da‘vâya tasaddî eyledikde ben dahi emlâk-ı mezbûreyi senin celâ-yı vatanından sâhib-i arz bana tefvîz eyledi deyü müdâfa‘a eylemiş idim el-hâletü hâzihî ben emlâk-ı mezbûreyi ma‘rifet-i sâhib-i arz ile mezbûr Hasan’a kasr-ı yed eyledikden sonra husûs-ı mezbûra müte‘allika âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ min-şehri Ramazâni’l-mübârek sene 1137. Şuhûdü’l-hâl: Ahmed b. Mehmed, Mustafa b. Receb, Ali b. Hüseyin, Salih b. Hasan, İbrahim b. Muharrem.