Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 174 Hüküm no: 155 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife bt. Rabia’nın kendisine üç yıl hizmet eden Ayşe bt. Mustafa ile zimmetlerini ibra ettikleri El-emru hasbemâ hurrire anhu nemakahu’l-fakîr azze şânuhû el-Hâc Mustafa el-Kādî bi-medîne-i Galata -gufira leh-. Medîne-i Üsküdar’da Evliya mahallesinde sâkine Âişe bt. Mustafa nâm bikr-i bâliğa meclis-i şer‘de mahrûse-i Galata’da Yolcuzâde mahallesinde sâkine Şerife bt. Rabia bt. İbrahim b. Abdullah nâm hâtun tarafından zikri âtî ibrâyı tasdîka vekîli olduğu zât-ı mezbûreyi ma‘rifet-i şer‘iyye ile ârifân oğlu es-Seyyid Mustafa b. Ahmed ve es-Seyyid İbrahim b. es-Seyyid Veli Efendi nâm kimesneler şehâdetleriyle sâbit olan Sunullah Çelebi b. Hasan nâm kimesne mahzarında ikrâr ve takrîr-i kelâm edip bundan akdem müvekkile-i mezbûre Şerife Râbia Hâtun’a üç sene hizmet eylediğim cihetle bir köhne sandal çintiyân ve bir köhne kutnî alaca kaftan ve bir köhne mor çuka biniş ve bir köhne bogasi zıbun ve bir köhne bir gömlek ve bir köhne lâciverd çuka cübbe ve bir köhne çuka ferâce bana verip ben dahi her birini isti‘mâl eylediğimden sonra tekrâr alıkomuşdu el-hâletü hâzihî müvekkile-i mezbûre Râbia Hâtun eşyâ-i mezkûreyi yine bana teslîm ben dahi ba‘de’l-ahz ben husûs-ı mezbûra vesâir târih-i kitâba gelince beynimizde cereyân eden ahz u i‘tâ ve mu‘âmelât-ı şettâya müte‘allika âmme-i da‘vâdan müvekkile-i mezbûre Râbia Hâtun’un zimmetini ibrâ ve ıskāt edip ol dahi eşyâ-i mezkûreye vesâir târih-i kitâba gelince beynimizde cereyân eden ahz u i‘tâ ve mu‘âmelât-ı şettâya müte‘allika âmme-i da‘vâdan kezâlik benim ve işbu hâzır bi’l-meclis li-ebeveyn karındaşım İbrahim ile halam Ümmühâni bt. Mehmed nâm hâtunun zimmetimizi ibrâ-i âmm-ı kātı‘u’n-nizâ‘la ibrâ ve ıskāt eyledi dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-ışrîn min-şehri Ramazâni’l-mübârek sene 1137. Şuhûdü’l-hâl: İmâm Mehmed Efendi b. Mustafa, es-Seyyid İbrahim Çelebi b. Veli, Molla İsmail b. Ali. Ahmed Çelebi b. Mustafa, İbrahim b. Mustafa.