Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 175 Hüküm no: 156 Orijinal metin no: [22a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatib Mehmed Efendi’nin ortağı Süleyman Beşe b. Mustafa’ya müşterek olduğu sefine ile eşyalarını sattığı Mahmiye-i İstanbul’da Aşıkpaşa mahallesinde sâkin Hatib Mehmed Efendi b. Dersiâm Kürt Ali Efendi nâm kimesne meclis-i şer‘de işbu râfi‘u’l-kitâb Süleyman Beşe b. Mustafa nâm kimesne mahzarında ikrâr ve takrîr-i kelâm edip hâlâ Galata hâricinde Kalafat yerinde merbût örf-i fellâhînde üç direkli ta‘bîr olunur yirmi sekiz zirâ‘ sefîne ile bir sandal ve üç gomana ve bir mikdâr direk âlâtının nısfı benim ve nısf-ı âharı mezbûr Süleyman Beşe’nin ale’l-iştirâki’s-seviy mülkümüz olmağın ben sefîne-i mezkûre ve sandal ve üç gomana ve bir mikdâr direk âlâtından olan nısf hisse-i şâyi‘amı tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Süleyman Beşe’ye beş yüz guruşa bey‘ u temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr beş yüz guruşu mezbûr Süleyman Beşe yedinden tamâmen ahz u kabz eyledim ba‘de’l-yevm sefîne-i mezkûre ve sandal ve âlâtlarının mecmû‘u mezbûr Süleyman Beşe’nin mülk-i müşterâsı olup benim kat‘an alâka ve medhalim kalmamışdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis ve’l-ışrîn min-şehri Ramazâni’l-mübârek sene 1137. Şuhûdü’l-hâl: el-Hâc Ahmed b. Ali, el-Hâc Süleyman b. Ali, Mustafa Beşe b. el-Hâc Süleyman, Hüseyin Reis b. Ali, Makaracı Ali b. Mehmed, Makaracı Mustafa b. Abdulbâki, Gözüotlu el-Hâc Ali b. Mustafa.