Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 177 Hüküm no: 161 Orijinal metin no: [22b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Ağa b. İbrahim’in Luizo v. Fransizko tarafından ayartılıp kiliseye götürülen cariyesini iade etmesi gerektiği Hâvâss-ı Refî‘a kazâsı muzâfâtından Çekmece-i Kebîr nâhiyesine tâbi‘ Kalikratya nâm karye sâkinlerinden işbu râfi‘u’l-kitâb İsmail Ağa b. İbrahim nâm kimesne meclis-i şer‘de Lovizo v. Fransızko nâm zimmî muvâcehesinde üzerine da‘vâ ve takrîr-i kelâm edip merkūm Lovizo târih-i kitâbdan üç gün mukaddem zikr olunan Kalikratya karyesinde vâki‘ sâkin olduğum menzilimden beş yüz guruş kıymetli Moraviyyetü’l-asl ma‘lûmü’l-evsâf Maryora nâm câriye-i memlûkemi ayardıp tegayyüb etmeğin suâl olunup takrîri tahrîr ve mûceb-i şer‘îsi icrâ olunmak matlûbumdur dedikde gıbbe’s-suâl merkūm Luizo cevâbında fi’l-vâki‘ müdde‘î-i mezbûr İsmail Ağa’nın karye-i mezbûrede vâki‘ sâkin olduğu menzilinden ber-vech-i muharrer üç gün mukaddem Moraviyyetü’l-asl Maryora nâm câriye-i memlûkesini ayardıp Galata’da Venedik Kenîsesi’nde olan râhiblere teslîm eylediğini tâyi‘an ikrâr ve i‘tirâf etmeğin mûcebiyle câriye-i mezbûre mevcûd ise aynını müstehlek ise ba‘de’l-beyân kıymet-i şer‘îsini müdde‘î-i mezbûr İsmail Ağa’ya teslîme merkūm Luizo’ya tenbîh birle mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin aşer min-şehri Şa‘bâni’l-mu‘azzam sene 1137. Şuhûdü’l-hâl: İbrahim Çelebi b. Muharrem, Halil Çelebi b. Mustafa, İbrahim Çelebi b. Mustafa, Mustafa b. Ahmed, Yusuf b. Abdullah, Mehmed b. Ahmed, Mustafa b. Ahmed.