Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 178 Hüküm no: 162 Orijinal metin no: [22b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Galata’daki demircilerin çivicilerden kiradan başka imdadiye taleb edemeyecekleri Mahrûse-i Galata ve tevâbi‘inde vâki‘ mismâr kat‘ eden çivici tâifesinin müsin ve ihtiyâr ustalarından işbu hâmilü’r-rakīm Parnik v. Karzo Sergiz v. Abraham ve Vartan v. Haçuk nâm Ermeniler vesâirleri meclis-i şer‘de mahrûse-i Galata a‘mâlinden kasaba-i Tophane’de Çavuşbaşı’da kâin demirci tâifesinin kethudâları Usta Ahmed b. Yusuf ve Halil b. el-Hâc Mustafa ve Mustafa Beşe b. Halil nâm kimesneler vesâirleri mahzarlarında her biri tasvîr-i müdde‘â edip biz bin yetmiş târihinde İstanbul’da çivici tâifesine yamak ta‘yîn olunup târih-i mezbûrdan beri tâife[-i mezbûre] vâki‘ olan tekâlîflerine imdâd ve i‘ânet edegeldiğimizden mâ‘adâ hâlâ İran sefîrine irsâli fermân olunan dökmeci ve kalcı tâifeleriyle esnâfımız fukarâsı bâ-fermân-ı âlî kazgancı tâifesine yamak ta‘yîn olunup hâlimize göre onların tekâlîflerine imdâd ve i‘ânet edip ve zikr olunan Çavuşbaşı demircileri tarafından ve taraf-ı âhardan nizâm-ı kadîme mugāyir imdâdiye talebiyle bir ferd dahl u ta‘arruz ve rencîde eylememek üzere hâlâ ser-mi‘mârân-ı hâssa olan Mehmed Ağa yedimize i‘lâm verip ve mûcebiyle amel olunmak üzere musahhih fermân-ı âlî sâdır olmuş iken eşhâs-ı merkūme fermân-ı âlî ve nizâm-ı kadîme mugāyir imdâdiye talebiyle bizi rencîdeden hâlî değillerdir te‘addîleri men‘ u def‘ olunması murâdımızdır deyü da‘vâ ve min külli’l-vücûh takrîr-i meşrûhlarına muvâfık bir kıt‘a musammem fermân-ı âlî ile mu‘anven i‘lâm ısdâr etmeleriyle ba‘de’l-kırâ’e ve’l-istintâk zikr olunan demirci tâifesi hâl minvâl-i muharrer üzere olduğunu ikrâr ve i‘tirâf etmeğin ba‘de’l-yevm fermân-ı âlîye ve i‘lâm ve nizâm-ı kadîme mugāyir imdâdiye talebiyle çivici tâifesine dahl u ta‘arruz eylememek üzere demirci tâifesine tenbîh birle mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ aşer min-şehri Ramazâni’l-mübârek sene 1137. Şuhûdü’l-hâl: es-Sâbikūn.