Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 178 Hüküm no: 163 Orijinal metin no: [22b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Todori v. istarati’nin Firuzağa’daki bakkalındaki eşyaların dörtte bir hissesini Poli Karpuz v. Lazari’ye sattığı Bakkal tâifesinden Todori v. İstarati v. Rodo nâm zimmî meclis-i şer‘de işbu hâmilü’r-rakīm Poli Karpuz v. Lazari nâm zimmî muvâcehesinde ikrâr ve takrîr-i kelâm edip mahrûse-i Galata muzâfâtından kasaba-i Tophane’de Firuzağa mahallesinde vâki‘ taht-ı icâremde olan bir bâb bakkal dükkânı derûnunda mevcûd eşyâ-yı memlûkemden takımı ile dört bakır mîzân ve sagīr ve kebîr dört kantar ve üç ağaç tabla ve sagīr ve kebîr kırk zenbil ve otuz potin ve fuçu vesâir âlât-ı lâzime-i ma‘lûmenin dört sehimden bir sehmini bi-safkatin vâhidetin merkūm Poli Karpuz’a altmış guruşa bey‘ u teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabûl eyledikden sonra eşyâ-i muharrere-i mezkûrenin rub‘-ı şâyi‘inin aynına ve semenine ve gabn-ı tağrîrine müte‘allika âmme-i da‘vâdan merkūm Poli Karpuz’un zimmetini ibrâ ve ıskāt eyledim ba‘de’l-yevm eşyâ-yı muharrere-i mezkûrenin rub‘-ı şâyi‘i merkūm Poli Karpuz’un mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’r-râbi‘ ve’l-ışrîn min-şehr-i Ramazâni’l-mübârek sene 1137. Şuhûdü’l-hâl: İbrahim Çelebi b. Muharrem, es-Sâbikūn.