Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 179 Hüküm no: 164 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hayyat İbrahim Çelebi’nin varislerinden kızı Hadice Hatun’un hisselerinin el-Hâc Mahmud Ağa b. Hüseyin Ağa’ya satıldığı Mahrûse-i Galata hâricinde Sarı Lütfi mahallesinde sâkin iken bundan akdem vefât eden Hayyat İbrahim Çelebi b. Yusuf’un verâseti sulbî kebîr kızları Rukiye ve Hadice nâm hâtunlara münhasıra olduğu lede’l-enver zâhir ve mukarrer oldukdan sonra mezbûre Hadice Hâtun’un zevci ve tarafından ikrâr-ı câi’z-zikre vekîl olduğu zât-ı mezbûreyi ma‘rifet-i şer‘iyye ile ârifân mahalle-i mezbûre ahâlîsinden Ahmed Çelebi b. Hüseyin ve Mehmed Çelebi b. Mustafa nâm kimesneler şehâdetleriyle sâbit olan Mehmed b. Hüseyin nâm kimesne meclis-i şer‘de mahalle-i mezbûre sükkânından işbu sâhibü’l-kitâb el-Hâc Mahmud Ağa b. Hüseyin Ağa mahzarında bi’l-vekâle ikrâr ve takrîr-i kelâm edip zevcem müvekkile-i mezbûre Hadice Hâtun’a babası müteveffâ-yı mezbûr İbrahim Çelebi’nin terekesinden olup mahalle-i mezbûrede vâki‘ bir tarafdan mezbûr el-Hâc Mahmud Ağa mülkü ve bir tarafdan ba‘zen mezbûr el-Hâc Mahmud Ağa ve ba‘zen Hasan Çavuş mülkleri ve bir tarafdan Muhzır Mustafa Çelebi mülkü ve bir tarafdan ba‘zen Tavukcu Mehmed nâm kimesne mülkü ve bir tarafdan ba‘zen tarîk-i âm ile mahdûd fevkānî üç bâb harâb oda ve sofa ve dehlîz ve kenîf ve tahtânî üç bâb harâb odaları ve bir bi’r-i mâ ve bir mikdâr bahçeyi müştemil olup merhûm ve mağfûrun leh Sultan Bayezid Hân -tâbe serâhu- hazretlerinin vakf-ı şerîflerine senevî altı akçe mukāta‘ası olan mülk menzilde nısf hisse-i şâyi‘asını mezbûr el-Hâc Mahmud Ağa ile tarafeynden îcâb ve kabûlü hâvî [bey‘-]i bâtt-ı sahîh-i şer‘î ile yüz altmış guruşa bey‘ u teslîm eyledikde ol dahi ber-vech-i muharrer iştirâ ve tesellüm ve kabûl eyledikden sonra semen-i mezbûr yüz altmış guruşu müşterî-i mezbûr yedinden bi’t-tamâm ve’l-kemâl ahz u kabz eyledi ba‘de’l-yevm menzil-i mahdûd-ı mezkûrun nısf-ı şâyi‘-i mezbûr el-Hâc Mahmud Ağa’nın mülk-i müşterâsı olup zevce-i müvekkile-i mezbûre Hadice Hâtun’un kat‘an alâka ve medhali kalmamışdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis ve’l-ışrîn min-şehr-i Ramazâni’l-mübârek sene 1137. Şuhûdü’l-hâl: Bosnavi Mustafa Efendi, Arusi Mustafa Efendi, el-Hâc Mustafa b. İsa, Hâfız Molla Ali, es-Seyyid Mustafa b. es-Seyyid Ali, es-Seyyid Ali b. es-Seyyid Ebûbekir, İbrahim Çelebi b. Mustafa, Muhzırzâde Hasan Çavuş b. Abdullah, el-Hâc Hasan b. Ahmed.