Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 181 Hüküm no: 166 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Ömer b. Süleyman’ın Rus asıllı cariyesi Gülbuy’u azat ettiği Mahrûse-i Galata muzâfâtından kasaba-i Fındıklı’da Selime Hâtun mahallesinde sâkin el-Hâc Ömer b. Süleyman nâm kimesne meclis-i şer‘de takrîr-i kelâm ve ta‘bîr ani’l-merâm edip ıtk-ı âtî sudûruna değin bana rıkkiyyetini mu‘terife olan orta boylu açık kaşlı elâ gözlü Rusiyyetü’l-asl kâfiretü’l-mille râfi‘atü’l-kabâle Gülbûy nâm câriye-i memlûkem ile sadrî sagīr oğlu olup kezâlik açık kaşlı elâ gözlü Rusiyyü’l-asl Müslimü’l-mille tahmînen yedi yaşında Abdullah b. Abdülmennân nâm abd-i memlûkumu hasbeten lillâhi te‘âlâ ve haseneten li-rûhi resûli’l-mu‘allâ mâlımdan tahrîr ve i‘tâk ve zümre-i ahrâr-ı asliyyîne idrâc ve ilsâk eyledim ba‘de’l-yevm mevsûfân-ı merkūmân sâir ahrâr-ı asliyyîn gibi hür olup üzerinde velâ-i şer‘îden gayri hakkım bâkī kalmadı dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis min-Şevvâli’l-mükerrem sene 1137. Şuhûdü’l-hâl: Arusi Mustafa Efendi, İbrahim b. Muharrem, es-Seyyid el-Hâc Hasan, el-Hâc Ahmed b. el-Hâc Süleyman, el-Hâc Mehmed, el-Hâc Abdurrahman, Mehmed Reis b. Ali.