Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 181 Hüküm no: 167 Orijinal metin no: [23b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saime bt. Mehmed’in varislerinden kızı Saliha ile Âlime ve oğlu el-Hâc Mehmed’den kendisine isabet eden hisseyi tahsil ettiği Vilâyet-i Anadolu’da medîne-i Sinob’da İçkale’de sâkine iken bundan akdem vefât eden Saime bt. Mehmed b. Abdurrahman nâm hâtunun verâseti sadrî kebîr oğlu el-Hâc Mehmed ile sadriye kebîre kızları Saliha ve Âlime nâm hâtunlara münhasıra olduğu lede’ş-şer‘i’l-enver zâhir ve mukarrer oldukdan sonra hâlâ mahmiye-i İstanbul’da Haydarpaşa kurbünde Bıçakcı mahallesinde sâkine mezbûre Saliha bt. el-Hâc Süleyman b. Abdullah nâm hâtunun hâlâ zevci ve tarafından ikrâr-ı câi’z-zikre vekîli olduğu zât-ı mezbûreyi ma‘rifet-i şer‘iyye ile ârifân es-Seyyid Mehmed Çelebi b. Murad ve es-Seyyid Hüseyin Çelebi b. Musli nâm kimesneler şehâdetleriyle sâbit olan es-Seyyid Ahmed Çelebi b. es-Seyyid Mehmed nâm kimesne meclis-i şer‘de tereke-i müteveffâ-yı mezbûre vâzı‘u’l-yed olan mezbûr el-Hâc Mehmed b. el-Hâc Süleyman b. Abdullah tarafından sâbitü’l-vekâle vekîli olan işbu râfi‘u’l-kitâb es-Seyyid Mustafa Çelebi b. es-Seyyid Abdurrahman nâm kimesne mahzarında bi’l-vekâle ikrâr ve takrîr-i kelâm edip zevcem müvekkile-i mezbûre Saliha Hâtun anası müteveffât-ı mezbûrenin terekesinden kendüye isâbet eden üç bin akçe hisse-i irsiyye-i şer‘iyyesini li-ebeveyn er karındaşı müvekkil-i mezbûr el-Hâc Mehmed tarafından vekîl-i mezbûr es-Seyyid Mustafa Çelebi yedinden bi’t-tamâm ahz u kabz eyledikden sonra anası müteveffât-ı mezbûre Saime Hâtun’un kalîl ü kesîr ve celîl ü hakīr terekesine müte‘allika âmme-i de‘âvî ve mutâlebât ve eymân ve muhâsamâtdan karındaşı müvekkil-i mezbûr el-Hâc Mehmed’in zimmetini ibrâ-i âmm-ı kātı‘u’n-nizâ‘la ibrâ ve ıskāt eyledi dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâbi‘ min-Şevvâli’l-mükerrem sene 1137. Şuhûdü’l-hâl: es-Seyyid Mehmed b. Murad, es-Seyyid Hasan Çelebi b. Mustafa, Abdurrahman Çelebi b. İbrahim, Ahmed Ağa b. Mustafa, Mehmed Çelebi b. Ahmed, Ali Reis b. Receb.