Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 182 Hüküm no: 168 Orijinal metin no: [23b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye bt. Abdullah’ın İbrahim b. Sami’den kızı Hadice için nafaka tahsil edeceği Mahmiye-i İstanbul’da Ağa Hamamı mahallesinde sâkine işbu râfi‘atü’l-vesîka Safiye bt. Abdullah nâm hâtun mahfil-i şer‘de İbrahim b. Sami nâm kimesne mahzarında takrîr-i kelâm ve ta‘bîr ani’l-merâm edip mezbûr İbrahim işbu hâzıra bi’l-meclis sulbiye sagīre kızı Hadice’yi li-ecli’t-tebennî bana teslîm eylemiş idi hâlâ sagīre-i mezbûrenin nafaka ve kisve bahâya ihtiyâcı olmağla kıbel-i şer‘den kadr-i kifâye meblağ farz ve takdîr olunması murâdımdır dedikde hâkim-i muvakkı‘-ı a‘la’l-kitâb -rafa‘a kadrahû mevlâhü’l-vahhâb- efendi dahi sagīre-i mezbûrenin nafaka ve kisve ve levâzım-ı sâiresiʼçün babası mezbûr İbrahim üzerine târih-i kitâbdan yevmî ikişer para farz ve takdîr eyleyip meblağ-ı mefrûz-ı mezkûru sagīre-i mezbûre Hadice’nin nafaka ve kisve ve levâzım-ı sâiresine harc ve sarfa ve lede’l-iktizâ istidâneye ve ınde’z-zafer babası mezbûr İbrahim üzerine rücû‘a mezbûre Safiye Hâtun’a izin vermeğin mâ-hüve’l-vâkı‘ bi’l-ibtigā ketb olundu. Fi’l-yevmi’r-râbi‘ min-Şevvâli’l-mükerrem sene 1137. Şuhûdü’l-hâl: Abdurrahim Efendi b. Osman, Mehmed Beşe b. Ahmed, Mustafa Efendi b. Mehmed, Ömer Efendi b. Muharrem, Halil Çelebi b. Mustafa, İbrahim b. Mustafa.