Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 183 Hüküm no: 169 Orijinal metin no: [23b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borcu terekesinden çok olan Pizadomoz v. Bayram’ın terekesine karşılık borcunu ödeyen kızı Furistine ile diğer hissedarların zimmetlerini ibra ettikleri Vilâyet-i Anadolu’da vâki‘ Ürgüb kazâsı tevâbi‘inden Zeynel nâm karyede sâkin iken bundan akdem düyûnu terekesinden ezyed olduğu hâlde hâlik olan Pizadomoz v. Bayram’ın verâseti zevce-i metrûkesi Mukrine bt. Elintaş nâm Nasrâniye kebîr oğulları Vasil ve Kalender ve kebîre kızı Furistine’ye münhasıra olup ve tashîh-i meseleleri bi-hükmi’l-ferâiz kırk sehimden i‘tibâr olunup sihâm-ı mezbûreden beş sehmi merkūme Mukrine’ye ve yedi sehmi merkūme Furistine’ye ve on dörder sehmi merkūmân Vasil ve Kalender’den her birine isâbet eylediği lede’ş-şer‘i’l-enver zâhir ve müte‘ayyin oldukdan sonra sagīre-i merkūmân Vasil ve Kalender mahfil-i şer‘de kız karındaşları merkūme Furistine tarafından ibrâ-i câi’z-zikri tasdîke vekîli olduğu şahs-ı merkūmeyi ma‘rifet-i şer‘iyye ile ârifân Buluk v. Lefter ve Tofofinos v. Lazari nâm zimmîler şehâdetleriyle şer‘an sâbit olan işbu hâmilü’r-rakīm Fantezi v. Yanaki nâm zimmî muvâcehesinde her biri bi’l-verâse ikrâr ve takrîr-i kelâm edip babam hâlik-i merkūm Pizadomoz’un eşhâs-ı ma‘lûmeye cem‘an yüz guruş düyûn-ı müteferrikası olup ve karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd bir sagīr menzil ve bir harâb bahçeden gayri bir nesnesi olmamağla biz dahi deyn-i mezbûru mâlımızdan edâ ve terekesini istihlâs murâd eylediğimiz ecilden terekesine vaz‘-ı yed eylememiş idik hâlâ kız karındaşımız müvekkile-i merkūme Furistine deyn-i mezbûru mâlından edâ ve babamız hâlik-i merkūmun terekesinden olan sâlifü’z-zikr menzil ve bağ ve tereke-i sâiresini istihlâs murâd etmeğin biz dahi zikirleri mârr olan menzil ve bağ ve babamız hâlik-i merkūmun kalîl ü kesîr ve celîl ü hakīr terekesinden mikdâr-ı mezkûr hisselerimize müte‘allika âmme-i da‘vâdan kız karındaşımız müvekkile-i merkūme Furistine’nin zimmetini ibrâ-i âmm ile ibrâ ve ıskāt eyledik dediklerinde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis min-Şevvâli’l-mükerrem sene 1137. Şuhûdü’l-hâl: Hatib İbrahim Efendi, Ürgüblü İsmail Çelebi, Serbölük İbrahim Çelebi, Serbölük Halil Çelebi, Yusuf b. Abdullah, Aften v. Nikola, Mardiros v. Yasur, Yasef v. Yovan, Simol v. Simyovan.