Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 183 Hüküm no: 170 Orijinal metin no: [23b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dirako v. Dimitraki’nin müşterek menzilini Danil v. Kosta’ya vererek karşılığında aldığı mahalden noksan kalan ücreti de tahsil ettiği Husûs-ı âti’l-beyânın mahallinde keşf u takvîm ve taksîmi bâbında fermân-ı âlî sâdır olmağın imtisâlen-leh savb-ı şer‘-i enverden mevlânâ Halil Efendi b. Hüseyin me’zûnen irsâl olunup ol dahi hâssa mi‘mârlardan İbrahim Halife b. Mustafa ve Mustafa Halife b. Hasan ile mahrûse-i Galata’da Sultan Bayezid mahallesinde vâki‘ zikri câî mülk menzile varıp zeyl-i vesîkada isimleri muharrer olan Müslimîn huzûrlarında akd-i meclis-i şer‘-i nebevî eyledikde Dirako v. Dimitraki nâm zimmî meclis-i ma‘kūd-ı mezbûrda işbu hâmilü’r-rakīm Danil v. Kosta nâm zimmî muvâcehesinde ikrâr ve takrîr-i kelâm edip mahalle-i merkūmede vâki‘ bir tarafdan Yorgi Hortare [24a] nâm zimmî mülkü ve bir tarafdan Penaye kenîsesi ve iki tarafdan tarîk-i hâs ile mahdûd ulyâda üç bâb oda ve bir sofa ve tahta bend vüstâda iki bâb oda ve bir matbah ve iki kenîf ve süflâda iki bâb oda ve iki bi’r-i mâ ve bir mikdâr arsa-i hâliye ve iki sokak kapısını müştemil işbu mülk menzil merkūm Danil ile ale’l-iştirâki’s-seviy mülkümüz olup her vechile vâsi‘ ve kabîl-i kısmet olmağla mi‘mârân-ı mezbûrân dahi zeyl-i sütûrda isimleri muharrer olan ebniye-şinâs Müslimûn ile menzil-i merkūmu keşf ve mesâha ve tahmîn-i sahîh ile tahmîn ve taksîm eylediklerinde menzil-i mezbûrun el-yevm kıymet-i şer‘iyyesi iki yüz elli bin altı yüz akçeye bâliğ olup meblağ-ı mezbûrdan yüz yirmi beş bin üç yüz akçesi nısf hissem mukābelesinde bana yüz yirmi beş bin üç yüz akçesi kezâlik nısf hissesi mukābelesinde merkūm Danil’e isâbet eylediği lede’ş-şer‘i’l-enver zâhir ve mütebeyyin oldukdan sonra mi‘mârân-ı mezbûrân dahi menzil-i mezbûrdan olup bir tarafdan merkūm Yorgi Hortare mülkü ve bir tarafdan kenîse-i merkūme ve bir tarafdan merkūm Danil’in hissesine ta‘yîn olunan mahal ve bir tarafdan tarîk-i âm ile mahdûd tabakāt-ı selâsede büyût-ı adîde ve dehlîz ve arsa-i hâliye ve kenîf ve bir sokak kapısını müştemil olup doksan beş bin üç yüz akçeye mukavvim olan mahal nısf hissemin noksânını tekmîl için şerîkim merkūm Danil bana otuz bin akçe vermek üzere benim nısf hisseme ta‘yîn ve tahsîs olunup ve yine menzil-i mezbûrdan olup bir tarafdan merkūm Yorgi Hortare mülkü ve bir tarafdan benim nısf hisseme ta‘yîn olunan mahall-i mezkûr ve iki tarafdan tarîk-i âm ile mahdûd tabakāt-ı selâsede büyût-ı adîde ve dehlîz ve tahta-bend ve bir sokak kapısını müştemil olup cem‘an yüz elli beş bin üç yüz akçeye mukavvim olan mahal nısf hissesinden ziyâdesi olan otuz bin akçeyi ber-vech-i muharrer nısf hisse-i merkūmenin noksânını tekmîl için bana vermek üzere şerîkim merkūm Danil’in nısf hissesine ta‘yîn ve tahsîs ve bir birinden ifrâz ve beynlerine alâmât-ı fâsıla vaz‘ olunup ve her birimiz bi’r-rızâ nısf hisse-i mu‘ayyene-i müfreze-i merkūmemizi ahz u kabz eylediğimizden mâ‘adâ bana teslîmi lâzım gelen meblağ-ı mezbûr otuz bin akçeyi dahi merkūm Danil bana def‘ u teslîm edip ben dahi yedinden tamâmen alıp kabz eylediğimden sonra meblağ-ı mezbûr otuz bin akçeye ve ta‘yîn olunan nısf hisse-i müfreze-i merkūmelerimize müte‘allika âmme-i da‘vâdan her birimiz âharın zimmetini ibrâ-yı âmm ile ibrâ ve ıskāt eyledik dedikde gıbbe’t-tasdîki’ş-şer‘î vâki‘ hâli mevlânâ-yı mezkûr mahallinde ketb ü tahrîr ve ma‘an ba‘s olunan Çukadâr Abdullah Beşe b. Mahmud ve Serbölük Halil b. Mustafa ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis aşer min-Şa‘bâni’l-mu‘azzam sene 1137. Şuhûdü’l-hâl: es-Seyyid Ali b. Osman, Ebûbekir Çelebi b. Hasan, Hüseyin Çelebi b. Halil, Ahmed Çelebi b. Salih, İbrahim Halife b. Mustafa, Muhzır Ali b. Ahmed, Ellez v. Hüdaverdi, Aslan v. Hüdaverdi, Margarit v. Sava, Pavlov v. Sefer, Yanaki v. Rali, Mihal v. Abram, Yani v. Papa Yorgi.