Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 185 Hüküm no: 171 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Abdullah’ın Ömer b. Hamza’dan kızı Ayşe için nafaka alacağı Mahrûse-i Galata muzâfâtından kasaba-i Tophane’de Sakabaşı mahallesinde sâkine işbu râfi‘atü’l-vesîka Hadice bt. Abdullah nâm hâtun zâtı ba‘de’t-ta‘rîfi’ş-şer‘î meclis-i şer‘de zevc-i muhâlı‘ı Ömer b. Hamza nâm kimesne mahzarında ikrâr ve takrîr-i kelâm edip zevcim mezbûr Ömer’in firâşından hâsıla ve benden mütevellide bi-hakkı’l-hıdâne hacr ve terbiyemde olan işbu sadriye sagīre kızı Âişe’nin nafaka ve kisve bahâya eşedd-i ihtiyâcı olmağın babası mezbûr Ömer üzerine cânib-i şer‘den kadr-i kifâye meblağ farz ve takdîr olunması murâdımdır dedikde hâkim-i muvakkı‘-ı sadr-i kitâb tûbâ-lehû ve hüsnü-meâb efendi hazretleri dahi sagīre-i mezbûrenin nafaka ve kisve ve levâzım-ı sâiresiʼçün babası mezbûr Ömer üzerine tarafeynin rızâsıyla târih-i kitâbdan beher yevm altışar akçe farz ve takdîr edip meblağ-ı mefrûz-ı mezkûru sagīre-i mezbûrenin nafaka ve kisve ve levâzım-ı sâiresine harc ve sarfa ve lede’l-iktizâ istidâneye ve ınde’z-zafer babası mezbûr Ömer üzerine rücû‘a izin verilmeğin mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis min-Şevvâli’l-mükerrem sene 1137. Şuhûdü’l-hâl: es-Seyyid Ali Ağa b. Hasan, Osman b. Mehmed, İbrahim b. Mustafa, Mehmed b. Ahmed, Ahmed b. Mustafa.