Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 185 Hüküm no: 172 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İmam el-Hâc İsmail Efendi b. el-Hâc Mustafa Efendi’nin menzilini kızı Hadice’ye sattığı Mahrûse-i Galata muzâfâtından kasaba-i Tophane’de Firuzağa mahallesi sükkânından İmâm el-Hâc İsmail Efendi b. el-Hâc Mustafa Efendi nâm kimesne meclis-i şer‘de sulbî kebîr kızı olup mahalle-i mezbûrede sâkine Hadice nâm hâtunun zevci ve tarafından ikrâr-ı âti’z-zikri tasdîka vekîl olduğu zât-ı mezbûreyi ma‘rifet-i şer‘iyye ile ârifân mahalle-i mezbûre ahâlîsinden Osman Çelebi b. Ahmed ve Mehmed b. Mustafa nâm kimesneler şehâdetleriyle sâbit olan işbu sâhibü’l-kitâb Molla Mesud b. Mehmed nâm kimesne mahzarında ikrâr ve takrîr-i kelâm edip hâlâ silk-i mülkümde münselik olup mahalle-i mezbûrede vâki‘ bir tarafdan Aşcıbaşı olan vakıf menzil ve bir tarafdan kalaycı mülkü ve bir tarafdan merkūm İskender Vakfı olup müezzin meşrûtası olan menzil ve bir tarafdan tarîk-i âm ile mahdûd fevkānî iki bâb oda ve bir sofa ve dehlîz ve tahtânî ahur ve mahtab ve bi’r-i mâ ve kenîf ve bir mikdâr bahçeyi müştemil olup arsası merkūm İskender Vakfı’ndan olmağla mahalle-i mezbûre câmi‘-i şerîfinde imâm-ı evvelinde senevi altmış akçe mukāta‘ası olan mülk menzilimi kızım müvekkile-i mezbûre Hadice Hâtun’a tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz elli guruşa bey‘ u teslîm edip ol dahi ber-vech-i muharrer iştirâ ve tesellüm ve kabûl eyleyip semeni olan meblağ-ı mezbûr yüz elli guruşa müte‘allika âmme-i da‘vâdan kızım müvekkile-i mezbûrenin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm menzil-i mahdûd-ı mezkûr bi-cemî‘i mâ yeştemilühû ve yahvîhi kızım müvekkile-i mezbûre Hadice’nin mülk-i müşterâsıdır keyfe mâ yeşâ ve yahtâr mutasarrıfa olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis min-şehr-i Ramazâni’l-mübârek sene 1137. Şuhûdü’l-hâl: Mehmed b. Ali, Ahmed Efendi b. Mustafa imâm, Hasan Çelebi b. Mustafa, Süleyman Çelebi b. Mustafa, İbrahim Beşe b. Abdullah, el-Hâc Musa b. Hasan, Ahmed Çelebi b. Abdullah, el-Hâc Hüseyin b. Halil, Çorbacı Mustafa Ağa, Hüseyin Çelebi b. Eyüb, İbrahim Çelebi b. Musa, İbrahim Çelebi b. Muharrem.