Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 186 Hüküm no: 173 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İmam İsmail Efendi’nin vakıf arsa üzerine yaptırdığı bina davasında mütevelli Mehmed Çelebi’nin haksız olduğu Mahrûse-i Galata muzâfâtından kasaba-i Tophane’de Firuzağa mahallesinde vâki‘ câmi‘-i şerîfde hâlâ imâm olan işbu râfi‘u’l-vesîka el-Hâc İsmail Efendi b. el-Hâc Mustafa nâm kimesne meclis-i şer‘de merhûm İskender nâm sâhibü’l-hayrın vakfına mütevellî olan Mehmed Çelebi b. Ali nâm kimesne mahzarında üzerine da‘vâ ve takrîr-i kelâm edip merhûm-ı mezbûrun galle ve tasarrufu imâm olanlara meşrûta vakfı olup mahalle-i mezbûrede vâki‘ bir tarafdan Aşcıbaşı Vakfı ve bir tarafdan Kalaycı mülkü ve bir tarafdan merhûm-ı mezbûrun müezzin olanlara meşrûta vakıf menzili ve bir tarafdan tarîk-i âm ile mahdûd vakıf menzil ber-mûceb-i şart-ı vâkıf imâm olduğum cihetle taht-ı tasarrufumda olup lâkin menzil-i mezbûr mürûr-ı eyyâm ve kürûr-ı a‘vâm ve şühûr ile harâb ve enkāz-ı mevcûdesi dahi bi’l-külliye zâyi‘ ve telef olmağla arsa-i sırfa kalıp ve taraf-ı vakıfdan dahi bir vechile binâya müsâ‘ade olmamağın ben dahi târih-i kitâbdan on sene mukaddem arsa-i mevkūfe-i mezbûre üzerine mâlım ile mülküm olmak üzere fevkānî iki bâb oda ve bir sofa ve dehlîz ve tahtânî ahur ve mahtab ve kenîf ve bi’r-i mâyı müceddeden binâ ve işhâd eylemiş idim binâen alâ-zâlik hâlâ menzil-i mezbûru senevî altmış akçe mukāta‘a ile âhara bey‘ etmek murâd eylediğimde mütevellî-i mezbûr mümâna‘at eder suâl olunup men‘ olunması matlûbumdur dedikde gıbbe’s-suâl mütevellî-i mezbûr Mehmed Çelebi cevâbında fi’l-vâki‘ imâm-ı mezbûr el-Hâc İsmail Efendi menzil-i mezbûrun ebniyesini vakıf olmak üzere binâ eylediğini iddi‘â edip müdde‘î-i mezbûrun ebniye-i mezbûreyi ber-vech-i muharrer mülkü olmak üzere binâ ve işhâd eylediğini bi’l-külliye inkâr edicek evvelâ mütevellî-i mezbûrdan müdde‘î-i mezbûr el-Hâc İsmail Efendi ebniye-i merkūmeyi ber-minvâl-i muharrer vakıf için binâ eylediğini mübeyyine beyyine taleb olundukda ityân-ı beyyineye kādir olmayıp ve sâniyen imâm-ı mezbûr el-Hâc İsmail Efendi’den ber-vech-i mufassal müdde‘âsını mübeyyine beyyine taleb olundukda udûl-i ahrâr-ı ricâl-i müslimînden olup mahalle-i mezbûre ahâlîsinden Ahmed Çelebi b. Abdullah ve Süleyman Çelebi b. Mustafa ve Osman Çelebi b. Ahmed ve Mehmed Çelebi b. Mustafa nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ imâm-ı mezbûr el-Hâc İsmail Efendi ber-vech-i meşrûh arsa-i mahdûde-i mevkūfe-i mezbûre üzerinde mevcûde olan fevkānî iki bâb oda ve bir sofa ve dehlîz ve tahtânî ahur ve mahtab ve kenîf ve bi’r-i mâyı târih-i kitâbdan on sene mukaddem mâlıyla mülkü olmak üzere binâ edip ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde gıbbe ri‘âyet-i şerâiti’l-kabûl şehâdetleri makbûle olmağın mûcebiyle ba‘de-l-hükm mütevellî-i mezbûr Mehmed Çelebi bilâ vech-i şer‘î imâm-ı mezbûr el-Hâc İsmail Efendi’ye mu‘ârazadan men‘ birle mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis min-şehr-i Ramazâni’l-mübârek sene 1137. Şuhûdü’l-hâl: es-Sâbikūnü’l-evvelûn.