Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 187 Hüküm no: 174 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe adlı cariyenin Müslüman olduğu anlaşıldığından Sabetay adlı Yahudiye satışından vazgeçildiği Esirci tâifesinden şerîkler olan Ahmed Beşe b. Mustafa b. Ali ve Çakır Mehmed b. Abdülkerîm b. Abdullah nâm kimesneler ile Ayvaz v. Yorgi v. Yani nâm zimmî taraflarından bey‘-i câi’z-zikri fesh ve ikāleye vekîlleri olduğu Hasan Ağa b. İskender ve Mustafa Beşe b. Ahmed nâm kimesneler şehâdetleriyle mahzar-ı hasm-ı münker-i şer‘îde şer‘an sâbit ve vekâletine hükm-i şer‘î lâhik olan Ömer Beşe b. Hasan meclis-i şer‘de işbu hâmilü’r-rakīm Sabetay v. Avram nâm Yahûdi muvâcehesinde bi’l-vekâle ikrâr ve takrîr-i kelâm edip müvekkillerim mezbûrûn Ahmed Beşe ve Çakır Mehmed ve Ayvaz târih-i kitâbdan altı ay mukaddem iştirâken mülkleri olan işbu orta boylu açık kaşlı sarı elâ gözlü Âişe nâm câriyelerini kâfire olmak üzere merkūm Sabetay’a iki yüz doksan guruş semen-i medfû‘ ve makbûza bey‘ u teslîm eylemişler imiş lâkin mevsûfe-i merkūme Âişe’nin Müslim olduğu şer‘an zâhir ve mütebeyyin olmağın ben dahi vekâlet-i mahkiyem hasebiyle taleben li’l-ecr ve’s-sevâb merkūm Sabetay ile akd-i mezbûru beynimizde bi’r-rızâ fesh ve ikāle eylediğimizden sonra her birimiz bi’l-asâle ve bi’l-vekâle def‘-i semen ve kabz-ı mebî‘ eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis ve’l-ışrîn min-şehr-i Ramazâni’l-mübârek sene 1137. Şuhûdü’l-hâl: İbrahim Çelebi b. Muharrem, Halil Çelebi b. Mustafa, İbrahim b. Mustafa, Mustafa b. Ahmed, Mehmed b. Ahmed, Ali b. Abdullah.