Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 188 Hüküm no: 175 Orijinal metin no: [24b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Abdullah’ın Ömer b. Hamza’dan muhalaa ile boşandığı Mahrûse-i Galata muzâfâtından kasaba-i Tophane’de Sakabaşı mahallesinde sâkine Hadice bt. Abdullah nâm hâtun zâtı ba‘de’t-ta‘rîfi’ş-şer‘î meclis-i şer‘de zevc-i muhâlı‘ı işbu râfi‘u’l-vesîka Ömer b. Hamza nâm kimesne mahzarında bi-tav‘ihâ ikrâr ve takrîr-i kelâm edip zevcim mezbûr Ömer ile beynimizde adem-i hüsn-i mu‘âşeretden nâşî hul‘a tâlibe ve râgıbe olduğum cihetle zimmetinde mütekarrır ve ma‘kūdün aleyh olan on iki guruş mehr-i mü’eccelimden geçip nafaka-i iddet ve me’ûnet-i süknâm dahi kendi üzerime olmak üzere zevcim mezbûr Ömer ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru ba‘de’l-kabûl hukūk-ı zevciyyete müte‘allika âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis min-Şevvâli’l-mükerrem sene 1137. Şuhûdü’l-hâl: es-Seyyid Ali b. Hasan, Osman b. Mehmed, İbrahim b. Mustafa, Ali b. Ahmed, Ahmed b. Ahmed, Ahmed b. Mustafa.