Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 188 Hüküm no: 176 Orijinal metin no: [24b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Mehmed’in Zenci asıllı Müslim cariyesini kusurlu olması nedeniyle satın aldığı Tunuslu Ramazan’a iade etmesi Mahrûse-i Galata’da Câmi‘-i Cedîd mahallesinde sâkin işbu râfi‘u’l-vesîka Ahmed b. Mehmed nâm kimesne meclis-i şer‘de takrîr-i kelâm ve ta‘bîr ani’l-merâm edip işbu mu‘âyene olunan orta boylu açık kaşlı kara gözlü Zenciyyetü’l-asl Müslimetü’l-mille Kavruka nâm câriyeyi cemî‘ uyûbundan sâlime olmak üzere târih-i kitâbdan yirmi iki gün mukaddem Tunuslu Ramazan nâm tüccârdan seksen iki guruş semen-i makbûza iştirâ ve tesellüm eylemiş idim lâkin târih-i mezbûrdan üç gün mürûrunda câriye-i mezbûrenin reddini mûcib ayb-ı kadîmine muttali‘ olup câriye-i merkūmeyi mezbûr Ramazan’a red murâd eylediğimde mezbûr Ramazan diyâr-ı âhara gitmeğle ben dahi câriye-i mezbûreyi mahrûse-i mezbûre hâricinde Bedreddin Bey mahallesinde sâkin Hadice bt. Abdullah nâm hâtuna emânet vaz‘ etmiş idim hâlâ câriye-i mezbûre etıbbâya irâ’et olunup takrîrleri tahrîr ve kıbel-i şer‘den yedime hüccet-i mu‘tebere i‘tâ olunmak matlûbumdur dedikde [25a] câriye-i mezbûre hâssa tabîblerden Mehmed Efendi b. Abdullah ve Ahmed Efendi b. Abdullah nâm tabîblere irâ’et olundukda fi’l-hakīka câriye-i mezbûre …? marazlarına mübtelâ olup ve ayaklarında olan şiş istiskā-ı lahm-i mukaddemesidir ve maraz-ı mezbûr otuz günden ekalde hâdis olur değildir deyü mezbûrândan her biri keyfiyet-i muharrereyi alâ tarîki’ş-şehâde haber vermeğin işbu sahîfe-i sahîha li-ecli’s-sened ketb olunup mezbûr Ahmed’in yedine vaz‘ olundu. Fi’l-yevmi’r-râbi‘ min-Şevvâli’l-mükerrem li-sene seb‘a ve selâsîn ve mi’e ve elf. Şuhûdü’l-hâl: el-Hâc Kasım b. Ahmed, Receb b. Osman, İbrahim b. Mustafa, Halil b. Mustafa, Baba Yusuf b. Abdullah, Abdullah b. İsmail, Mehmed b. Ahmed, Ali b. Abdullah ve gayrühum.